Cortes de tráfico nas Pías polas obras de rehabilitación da ponte a partir deste martes

O Ministerio de Transportes anunciou este luns o inicio das obras de rehabilitación na ponte das Pías, que une os municipios de Ferrol e Fene, unha actuación que provocará afectacións ao tráfico desde a unha da tarde deste martes no tramo central da travesía, correspondente ao vial estatal FE-14.

O departamento público sinalou que se pecharán os carrís exteriores de circulación entre os puntos quilométricos 2,740 e 3,060, treito no que a circulación de vehículos limitarase a un carril por cada sentido.

Nun comunicado, o Goberno central precisou que non haberá restricións para o tránsito de peóns na zona e apuntou que se repararán "varios elementos metálicos da ponte que presentan signos de oxidación debido á exposición do ambiente mariño".

Ademais, Transportes xustificou as afectacións ao tráfico a prol de "garantir a seguridade dos traballadores e dos usuarios da vía" durante a execución dos traballos, período no cal a velocidade máxima reducirase a 40 quilómetros por hora.

A intervención, que virá acompañada da sinalización e balizamento precisos, enmárcase no programa de conservación e mantemento da Rede de Estradas do Estado.