Renfe aumentará o número de prazas con máis trens Avril a partir do 9 de xuño

O Ministerio de Transportes e Mobilidade Sostible informa de que a partir do 9 de xuño mellorarán os tempos de viaxe e aumentará o número de prazas dispoñibles no corredor ferroviario de alta velocidade Galicia-Madrid. A partir desa data, Renfe poñerá en marcha unha nova oferta con máis trens da serie Avril 106 de Talgo en circulación, en substitución dos tradicionais Alvia.

Ademais, indícase nun comunicado que "a compañía sacará á venda os billetes proximamente", cuxo obxectivo "é a ampliación da venda e facilitar aos viaxeiros a planificación dos seus desprazamentos de fronte ao período estival". Desde a posta en servizo dos novos trens S106 en Galicia en maio de 2024, as conexións con Madrid "melloraron con traxectos cun menor tempo de viaxe, máis prazas ofertadas (os S106 ofrecen máis de 500 prazas), mellores prestacións e frecuencias, a estrea do AVE máis aló de Ourense (Santiago, A Coruña, Vilagarcía, Pontevedra e Vigo), e prezos máis axustados grazas á posta en servizo dos Avlo".

Indícase tamén que coa chegada deste tipo de trens de rodadura desplazable melloráronse os tempos de viaxe de Santiago, Pontevedra, Vigo e A Coruña con Madrid "nuns 20 minutos". En canto ao total de prazas no corredor Galicia-Madrid, a partir do 9 de xuño Renfe "pasará a ofertar un 90 % máis de media, con respecto a abril de 2024 (antes de poñerse en servizo os S106)".

Infórmase, ademais, de que a oferta global Galicia-Madrid desde este día será de 11 frecuencias. O Ministerio informa de que está previsto que os billetes para viaxar a partir do 9 de xuño e ata outubro desde as cidades galegas a Madrid, con paso por Castela e León, "saian á venda proximamente", o que "permitirá aos viaxeiros adquirir billetes para todo o verán no corredor Galicia-Madrid".

Un reforzo "insuficiente"

A Xunta de Galicia considerou este luns que o anuncio deste reforzo estival para o traxecto Galicia-Madrid nas viaxes que se realicen entre o 9 de xuño e ata outubro é “insuficiente” xa que ademais só busca "tapar o caos e os incidentes ferroviarios".

Así o considerou o conselleiro de Presidencia, Xustiza e Deportes, Diego Calvo, que nun comunicado en resposta ao anuncio do Ministerio de Transportes, advirte que en Galicia "estamos afeitos a anuncios que despois non se cumpren ou non se axustan á realidade", así como "á falta de revisores, a continuos incumprimentos nos horarios e a problemas coa venda de billetes que impiden aos usuarios planificar as súas viaxes".

Respecto á venda de billetes, Calvo tachou de "incomprensible" que mentres que, por exemplo, a día de hoxe están á venda os billetes de Madrid a Barcelona ata decembro, "en Galicia temos que esperar ao 9 de xuño para ter dispoñibles os billetes ata outubro".

Ademais, "a menos dun mes para o 9 de xuño, non se indica á data na que se habilitará a venda, limitándose tan só dicir que será proximamente."

En canto ao aumento de frecuencias, Calvo remarcou que as 11 conexións diarias anunciadas non son unha novidade respecto a as dispoñibles o ano pasado tamén para as tempadas de verán e Nadal.

Reprocha ademais que non se ofrece concreción sobre os percorridos e horarios nos que se prevén incrementar as prazas nin información sobre de que maneira isto vai supoñer unha redución nos tempos de viaxe.