Os maquinistas esixen a Renfe que se reduza a velocidade máxima dos trens Avril de ancho fixo

O sindicato de maquinistas SEMAF esixiu a Renfe que reduza a velocidade máxima dos trens da serie S106 de Talgo (Avril) de ancho fixo para evitar a degradación acelerada do material e garantir a integridade física deste.

A petición prodúcese despois de que se detectasen novas marcas nos bogies de dous destes trens, que foron retirados da circulación na última semana de agosto, explica SEMAF nun comunicado.

Os bogies son as estruturas con rodas e eixos baixo a carrocería dun tren que facilitan a súa adaptación ás curvas e o cambio de vías.

Tras detectar as citadas irregularidades e comunicalas SEMAF á Inspección de Traballo, Renfe intensificou os controis preventivos mediante inspeccións con partículas magnéticas á vez que duplicou a frecuencia das inspeccións, entre outras medidas, que os maquinistas valoran, pero cren insuficientes.

"Insistimos na urxencia de adoptar accións adicionais debido á degradación acelerada que están a sufrir estes bogies en particular", explican.

Tal e como comprobaron os grupos de traballo durante as medicións que se levaron a cabo tras retirar estes vehículos da circulación: "Esta grave degradación está estreitamente ligada aos fortes movementos e ao comportamento anómalo que presenta o material cando circula a altas velocidades".

Renfe desbota por agora reducir a velocidade, pero farao se detecta a máis mínima evidencia científica e técnica

Renfe rexeita a proposta dos maquinistas de reducir a velocidade nos trens S106 de Talgo, despois de que a Axencia Estatal de Seguridade Ferroviaria (AESF) ratificase a idoneidade das medidas de vixilancia e control aplicadas ata o de agora pola compañía.

Con todo, a compañía non descarta facelo en canto haxa a máis mínima evidencia científica e técnica que apunte á necesidade de reducir a velocidade, esta será aplicada de xeito inmediato.

Segundo explican, aínda que a redución de velocidade ou a menor carga dos trens contribúe a alongar a vida útil destes elementos, reducir a velocidade non implica unha mellora adicional na seguridade.

Como medida adicional de prudencia, Renfe duplicou recentemente a frecuencia das inspeccións mediante partículas magnéticas, que pasaron de realizarse cada 10.000 quilómetros a efectuarse cada 5.000 quilómetros. A compañía mantén tamén un seguimento individualizado de cada bogie e retira preventivamente calquera elemento no que se detecten marcas ou indicios que requiran unha análise adicional.