Os traballadores queren saber que aconteceu na planta de Meicende

Os traballadores piden que se investigue a fondo. Queren saber que foi o que acabou coa vida dun compañeiro dunha empresa auxiliar que estaba a traballar na refinería de Repsol da Coruña. Outro traballador que o acompañaba segue grave no hospital. 

"Mentres a investigación non conclúa, ninguén sabe o que aconteceu nese accidente. Non sabemos que foi un fallo en cadea, un fallo dun sistema, dun protocolo. Como non sabemos que medidas tomar o que esiximos a Repsol que reforzara os medios humanos e materiais para ter seguridade a hora de traballar".

O accidente en que Unai, de 35 anos, morreu foi por un escape "controlado e illado", segundo informou o 112. O falecido e outro operario facían traballos de mantemento nunhas tubaxes da planta de Meicende cando inhalaron, "restos de gas residual". Segundo un traballador que se atopaba a poucos metros, podería ser ácido sulfhídrico. O compañeiro recuperouse case ao instante, pero Unai tivo que ser reanimado e estabilizado na refinería antes de levalo en ambulancia medicalizada ao hospital, onde faleceu.

"Necesitamos saber o que aconteceu para poder tomar medidas. Repsol ten a vontade de informarnos o día catro ou o cinco cando conclúa a comisión de investigación".

Hoxe é a cuarta xornada de protesta. Os traballadores das empresas auxiliares que traballan na refinería da Coruña decidiron manter o paro de maneira indefinida. Esta mañá fixeron unha manifestación que foi dende a refinería ata a Delegación do Goberno.