Os produtos da temporada, reunidos na Feira do Outono de Allariz
Unha trintena de postos participaron na 29ª edición da feira
A maioría son desta Reserva da Biosfera, pero tamén viñeron produtores do Bierzo, de Portugal e do resto de Galicia
Da súa horta trae directamente María unhas cestas de verdura fresca. Leva 29 anos vindo, desde a primeira edición da feira. "Trouxen castañas, verdura de todas as razas, kiwis, peras... o que teño na casa, no predio", enumera.
A feira do outono de Allariz é un escaparate dos produtos desta reserva da biosfera.
"Hoxe tiven un cliente de Salamanca. Que quería levar moito pan, porque alí di que non o ten", comenta un artesán panadeiro.
"Facemos queixo de cabra con leite fresco e varios sabores. Témolos doces, de castaña, de arando, de mel e noces... e tamén salgados, de pesto, de trufa", explica un queixeiro de Vilar de Santo.
Tamén se suman produtores do Bierzo, de Portugal e do resto de Galicia. Estas marmeladas de outono elabóranse na Cañiza. "Saben a froita de verdade. Nótase na cor, no sabor e en todo", asegura a produtora.
Tampouco podía faltar o mel. Hai varios postos especializados neste produto.
"De colmeas que temos aquí en Allariz, de dúas abellarizas. Principalmente o mel é de castiñeiro e silva". "Este ten própole, que ten propiedades antifúnxicas e antisépticas. E ademais é mel de silva, que é a lambonada perfecta para introducir as pequenas no mundo do mel", sinalan dous produtores de mel, un de Allariz e outra de Vilar de Santos.
Ata os rapaces da vila se suman a este mercado, cun notable éxito de público.
