Os participantes na Peregrinación Europea da Xuventude pasan polo Pórtico da Vocación

Os participantes na Peregrinación Europea da Xuventude tiñan aínda moi presente hoxe a experiencia do acto inaugural de onte. Din que a vivencia foi positiva pese á calor e a demora por problemas técnicos. Hoxe xa lles toca entrar de cheo nas actividades por grupos, moitas delas descoñecidas para eles, pero valoran o efecto sorpresa. 

Practicamente todos irán a San Martiño Pinario para pasar polo Pórtico das Vocacións, unha proposta que os organizadores consideran a actividade central da Peregrinación Europea da Xuventude. O percorrido de hora e media inclúe actividades concibidas arredor dos simbolismos xacobeos, como o abrazo ao Apóstolo ou visionado dun audiovisual no que o propio Mestre Mateo explica a obra representada no Pórtico da Gloria. Remata co paso polo labirinto das múltiples organizacións católicas nas que poderían materializar a súa potencial vocación relixiosa. 

Máis aló do cuestionamento vocacional, o que moitos agardan e que chegue a noite para gozar dos concertos aprazados na xornada inaugural porque o vento tirou un elemento do escenario. Por seguridade decidiron suspendelo e reprogramar todas as actuacións musicais previstas no aparcamento de Salgueiriños, lonxe do centro monumental.