Os novos nomes dunha ducia de concellos galegos entran en vigor este sábado
A Cañiza pasa a ser "A Caniza", Cangas incorpora o apelido "de Morrazo" e Alfoz, "do Castrodouro"
Os concellos Cerdedo Cotobade, Mondariz Balneario e Oza Cesuras eliminan o guión
A Ribeira de Piquín, O Campo Lameiro, O Castro de Caldelas, O Porto do Son e O Riós engaden artigo e Pastoriza pérdeo
Cangas de Morrazo incorpora "apelido"
A Caniza, A Ribeira de Piquín, Alfoz do Castrodouro, Cangas de Morrazo, Cerdedo Cotobade, Mondariz Balneario, O Campo Lameiro, O Castro de Caldelas, O Porto do Son, O Riós, Oza Cesuras e Pastoriza.
Son os nomes dos dez concellos revisados pola Real Academia Galega que se actualizan a partir deste sábado, 11 de abril. O DOG publicou o venres o decreto polo que o Nomenclátor de Galicia pon ao día máis de 4.000 topónimos.
En total, modifica 2.531 topónimos: 2.335 lugares, 182 parroquias e unha ducia de concellos. Ademais, incorpora 1.655 nomes de lugares, de tal xeito que o catálogo oficial pasa a contar con 42.909 rexistros.
A Ribeira de Piquín actualiza o seu nome. Carlos Castro/EUROPA PRESS
A Consellería de Cultura subliña na resolución o "proceso de deturpación" sufrido pola toponimia galega ao longo dos séculos.
"Isto provocou que o nome patrimonial dalgúns lugares fora substituído por unha forma castelanizada, allea á lingua galega, especialmente en usos oficiais".
O nomenclátor pretende restaurar as formas históricas patrimoniais recorrendo a fontes orais e documentais, fundamentadas en "criterios técnicos, filolóxicos e históricos".
Mondariz Balneario elimina o guión
Consenso cos municipios
O presidente da Xunta, Alfonso Rueda, explicou o pasado 30 de marzo, día de aprobación en Consello dos cambios, a necesidade de renovar este nomenclátor que data de 2003, tras un "amplo" estudo da RAG e o consenso cos municipios.
Os criterios nos que se basean estas revisións son etimolóxicos, de documentación histórica e tradición gráfica consolidada nos dous últimos dous séculos, ademais do uso oral e escrito da veciñanza.
Consello da Xunta do pasado día 30. MONICA ARCAY CARRO
Tamén se tivo en conta o respecto pola forma dialectal de cada lugar e tratouse de emendar erros, fundamentalmente no tocante ao uso de artigos.
A RAG lembra que, con base na Lei de Normalización Lingüística (1983), os topónimos de Galicia teñen como única forma oficial a galega e correspóndelle á Xunta a sanción final das denominacións de entidades de poboación que propón a academia.
Pastoriza perde o artigo
Motivación nos nomes de concellos
Os nomes de Cerdedo Cotobade e Oza Cesuras pasan a ser sen guión (estes dous concellos son os resultados de fusións), un signo que tamén perde Mondariz Balneario.
Alfoz recupera o seu nome histórico: Alfoz do Castrodouro que naceu na Idade Media e se mantivo nos séculos seguintes.
Tómase da antiga xurisdición do castelo de Castrodouro, con antecedentes que se remontan ao 1220, cando o rei Afonso VIII lle concede o privilexio de Benavente á poboación "quantum habet in termino de Ourio prol alfoz".
Segundo as motivacións detalladas pola Real Academia Galega, Cangas engade o "apelido" da península á que pertence e pasa a ser Cangas de Morrazo.
A Cañiza para a ser "A Caniza"
A Cañiza restitúe a forma galega tradicional documentada desde antigo: A Caniza, que deriva da palabra "cana" con acepción relativa a estruturas ou obxectos realizados mediante varas ou canas tecidas.
Riós pasa a ser O Riós, "en consonancia coas súas atestacións históricas e co uso que a poboación fai do artigo". Porto do Son incorpora o artigo, ao igual que O Campo Lameiro, A Ribeira de Piquín e O Castro de Caldelas.
En cambio, Pastoriza deixa de ter o artigo.
O Castro de Caldelas pasa a ser o nome oficial deste concello
.png)
