Veciños de Vigo reciben por erro o recibo do IBI do hospital Álvaro Cunqueiro

Varios veciños de Vigo recibiron na súa carpeta cidadá da sede electrónica municipal un recibo do IBI correspondente ao hospital Álvaro Cunqueiro. O importe do recibo ascende a 1.153.879,35 euros e está expedido a nome da Sociedade Concesionaria Novo Hospital de Vigo. Aínda que apareceu na carpeta electrónica de recibos pendentes de varios veciños, non implica unha obriga de pagamento, xa que non figuran como titulares do recibo.

"Vino nas redes, que lle chegara o IBI dun millón e pico de euros do Cunqueiro a xente que non vive nin a carón". "Para morrer do susto". "Nas redes sociais, un veciño colgou que lle pasaran o IBI, un millón de euros, e ao parecer nos comentarios poñían que a varias persoas tamén lle pasou", comentan tres veciñas de Valadares

A incidencia detectouse en distintos puntos da cidade, entre eles Valadares e Bouzas. O Concello atribuíu o ocorrido a un erro informático durante unhas probas do sistema, que se fan de xeito habitual.