Os mariscadores volven traballar á ría de Sada

Este luns, os mariscadores regresaron á ría de Sada tras a apertura do libre marisqueo. Unha medida acordada entre a Consellería do Mar e as confrarías da zona tras constatar a existencia de suficiente recurso no banco marisqueiro.

E por iso, desde primeira hora desta mañá, mariscadores de confrarías como Pontedeume, Ferrol ou Barallobre traballan arreo nesta zona do porto de Sada, no Faro de Fontán.

E alí poderán seguir ata finais de mes, ata o 31 de marzo. Iso si: establecéronse topes de capturas para cada xornada: seis quilos de ameixa babosa, dous de ameixa rubia e un quilo de cornicha.

"Un desastre. Hai marisco, pero non dá a talla. Na miña opinion é mellor pechar e deixalo ata o Nadal", explica Luis Gómez, mariscador da confraría de Barallobre.

"Temos esperanzas neste banco marisqueiro porque en decembro algún compañeiro marchou facendo a marea, estamos falando de oito quilos, pero chegamos aquí e atopamonos con que os dous primeiros din que mal", di Gustavo Chacartegui, patrón maior da confraría de Ferrol.

"Ninguen colleu o tope. Todos veñen con dous quilos ou un quilo", engade Gómez.

"Nunca o primeiro día fai proba. A ver como van saíndo os outros compañeiros e ao mellor dariamoslle (de marxe) esta semana. Porque apostabamos por estas tres semanas de marisqueo porque a situación en Ferrol é a peor da historia. E por iso confiabamos en que aquí fixeran ese balón de osíxeno para compensar eses dous meses de non traballar nada", conclúe Chacartegui.