Os mariscadores de Barallobre sementan 25.000 unidades de ostra plana nas praias
A semente forma parte dun proxecto de rexeneración dos bancos da ría de Ferrol avalado con fondos europeos
Os areais que rodean a confraría de Barallobre serven de banco de proba para un proxecto de rexeneración avalado con fondos europeos.
"Vimos que había posibiliade de traer cría de ostra e metela nas mesas e nos pochóns. Aí métese a semente e vai medrando", explica o Patrón maior de Barallobre, Jorge López.
Un traballo laborioso que lles levou todo o outono e os meses duros de inverno. O resultado é todo un éxito.
"Tivemos a capacidade de sacar máis de 25.000 unidades. Repoboamos as novas praias e ademais vai ter a capacidade de desovar e vainos deixar tamén alevíns", di o patrón maior de Barallobre.
Os mariscadores calculan que será tras o verán cando poidan iniciar a campaña de recollida dun produto con moito valor de mercado.
"A cotización pode andar entre os seis e dez euros por quilo a ostra plana", calcula Jorge López.
Na confraría de Barallobre estudan agora como poder estender este sistema a outras especies como é o caso da ameixa e a zamburiña.
