Os expertos advirten dos riscos de establecer un vínculo emocional coa intelixencia artificial

Para moitas persoas, sobre todo entre a mocidade, o espazo principal de socialización son as redes sociais e moitos mesmo converten, por exemplo, o Chat GPT nunha ferramenta de acompañamento, para pedir consellos sobre temas persoais e respostas para resolver os seus problemas. 

Os expertos advirten: a intelixencia artificial disfrázase de terapeuta e iso implica riscos.

"Algúns estudos americanos o que nos indican é que aproximadamente un 70 por cento dos adolescentes utilizan IA de xeito cotiá e que dese 70, un 70 por cento utilízano como acompañamento, como conselleiro emocional. É verdade que hai un nicho de negocio nese sentido e temos que estar atentos porque efectivamente substituír o vínculo humano polo vínculo cunha máquina ten repercusións a nivel da saúde emocional", di Ricardo Fandiño, psicólogo e vogal do Colexio Oficial de Psicoloxía de Galicia.

A Intelixencia Artificial non só dá respostas, formula preguntas e parece amosar interese polos problemas que se lle expoñen. Hai persoas que chegan a establecer un vínculo emocional ou de certa dependencia coa IA.

 "O risco é que realmente non é un acompañamento, é a simulación dun acompañamento. Chat GPT non sinte, non pensa como un ser humano, non sinte empatía, pero o simula moi ben", engade.

Un de cada tres nenos e adolescentes afirma que conversar cunha intelixencia artificial é como falar cun amigo. Os psicólogos destacan que hai dúas necesidades: regular o uso da IA e facer máis pedagoxía.

"É importante que os adolescentes non aprendan sós, temos que aprender con eles, temos que implicarnos e 
asumir de xeito corresponsable esa aprendizaxe, tanto desde o eido académico como desde as familias", destaca Ricardo Fandiño.