O Supremo anula o rexistro de alugueiros de curta duración por falta de competencia

O Tribunal Supremo acordou a nulidade do procedemento de rexistro único de arrendamentos de curta duración que queiran publicitarse en plataformas dixitais ao entender que o Estado carece de competencia para establecer esta regulación "exhaustiva".

En concreto, o Supremo subliña que o Estado carece de título competencial para establecer unha regulación exhaustiva dun rexistro nacional que se superpón aos autonómicos existentes respecto á inscrición de inmobles destinados a arrendamentos turísticos.

A Generalitat Valenciana recorrera a norma estatal que regulaba este procedemento de existro único de arrendamentos de curta duración (turístico, de tempada ou de cuartos) e creábase o portelo único dixital para a recollida e o intercambio de datos nos alugueiros de curta duración.

A sentenza do Tribunal Supremo estima parcialmente o recurso, anulando unicamente aqueles preceptos polos que se crea o chamado rexistro único de arrendamentos. Con todo, desestima o recurso no referente ás disposicións que regulan o portelo único dixital de arrendamentos, as obrigacións de transmisión de datos das plataformas en liña e a transmisión de datos con fins estatísticos.

O Supremo entende que, aínda que a norma europea obriga a acomodar os sistemas de rexistro e información existentes dos arrendamentos de curta duración, o que non determina é que o procedemento de rexistro establecido por un país deba ser nacional.

A sentenza considera que non estamos ante unha regulación substantiva dos arrendamentos de curta duración, senón que se trata dun procedemento de rexistro único dos inmobles que permite obter un numero como requisito necesario para poder ofertar estes alugueiros de curta duración en plataformas dixitais como Airbnb ou Booking.

Tamén considera que a regulación excede do que constitúen unhas "bases" ou "medidas de coordinación" concretas e establece unha regulación dun rexistro nacional que se superpón aos autonómicos existentes.

O Supremo si admite a competencia do Estado para regular o portelo único dixital. O tribunal recoñece que existe unha crecente preocupación polo alugueiro de aloxamentos de curta duración que utilizan os servizos das plataformas en liña e que se intenta poñer freo aos abusos que se veñen producindo nesta modalidade.

Tamén subliña que se produciu un aumento constante destes alugueiros e que iso incide na diminución do número de vivendas destinadas a alugueiros de longa duración, co conseguinte aumento do prezo da vivenda nas cidades ou xerando problemas de acceso e desprazamento de residentes habituais a outras zonas.

O rexistro único de alugueiros de curta duración empezou a ser efectivo en España o 1 de xullo de 2025. España converteuse no primeiro país da Unión Europea que o puxo en marcha.

Todas as vivendas destinadas a uso turístico ou de tempada debían contar obrigatoriamente cun código de rexistro para poder operar legalmente. Os aloxamentos que non tivesen este código de rexistro non poderían ofertarse nas plataformas.