A Avogacía do Estado pídelle ao Supremo que non paralice a regularización de inmigrantes

​​​​​​A Avogacía do Estado solicitou ao Tribunal Supremo que rexeite suspender preventivamente o proceso de regularización de inmigrantes aprobado polo Goberno, que foi recorrido por varias administracións autonómicas, como a Comunidade de Madrid, e entidades como Hazte Oír.

O Alto Tribunal celebra este mércores cinco vistas en que estudará as medidas cautelares solicitadas polo Goberno rexional de Isabel Díaz-Ayuso, Vox, Hazte Oír, a Asociación por la Reconciliación y Verdad Histórica e a Asociación Libertad y Justicia para suspender preventivamente o real decreto de regularización mentres se resolven os seus recursos.

Tamén outras comunidades, como Aragón ou Castela e León, anunciaron que levarían o real decreto ante o Supremo, aínda que as vistas deste mércores non lles afectan.

A Avogacía do Estado, en representación do Goberno, considera que a "suspensión da norma deixaría sen efecto útil á mesma, danando gravemente o interese xeral".

Máis integración social e entrada ao mercado de traballo

Nun escrito presentado ante o Supremo a Avogacía do Estado deixa claro que a concesión dunha autorización de residencia "non xera impacto nos servizos públicos" dado que, na actualidade, as persoas destinatarias desta medida xa son usuarias de tales servizos".

A obtención da autorización permite o acceso ao pleno exercicio dos dereitos recoñecidos polo ordenamento xurídico como o dereito ao traballo e  "garante o acceso á prestación sanitaria sen atender ao status da persoa estranxeira".

A Avogacía do Estado argumenta que deixar en suspenso a norma "danaría gravemente" os intereses dos potenciais solicitantes "dado que non poderían acceder ás autorizacións administrativas recollidas" nela porque a data límite para a presentación de solicitudes é o 30 de xuño.

Solicita ao Supremo que resolva a "falta de lexitimación activa" de Hazte Oír para recorrer, o primeiro paso para a inadmisión do seu recurso.