Os excesos das compras en liña

As compras en liña levan xa un tempo sendo unha realidade. De feito, hai un sector moi grande da poboación que xa cualifica este método como o seu favorito para realizar as súas compras.

Moita xente apunta que realiza as súas compras de xeito online polo aforro de tempo ou a comodidade que isto lles reporta ás súas vidas, pero hai que ter moito coidado con isto, porque debido a diversos factores presentes nas páxinas web, pódese chegar a caer na compra compulsiva.

"Compro cousas que realmente non necesito porque están rebaixadas ou igual compras un pantalón e ves unha camiseta por dous ou tres euros máis", di unha rapaza.

"Ti se vas fisicamente a unha tenda, normalmente vas en busca de algo en concreto. En cambio, se vas por Internet adoita levarte a outro enlace ou a outra pendra que, de repente, che gusta", comenta un rapaz.

"As aplicacións que se utilizan hoxe en día funcionan cun algoritmo que nos encamiñan a desexar e querer uns artigos que nin sequera tiñamos pensado no momento no que entramos na aplicación. Tamén é certo que dentro desas aplicacións utilizan pequenos minixogos, moi parecidos aos das tragaperras, que inciden todos nun circuíto, chamado circuíto do sistema límbico, que é a nosa parte máis impulsiva. Isto é o que fai que ao final estea gastando máis diñeiro do que realmente pensara", conta Amanda Roux, psicóloga especialista en condutas adictivas.

A propia Amanda Roux apunta algúns consellos para poñerlle remedio a esta situación:

"Desactivar as notificacións, non gardar nunca o número da tarxeta de crédito dentro da aplicación, facer unha lista do que realmente un quere comprar antes de entrar na aplicación e poñer un límite de gasto mensual".