A NASA anuncia posibles signos de vida pasada en Marte

A NASA informou este mércores do descubrimento de posibles sinais de vida pasada en Marte a partir dunha mostra de rocha recollida polo vehículo espacial Perseverance. O achado localizouse nunha formación chamada Cheyava Falls, situada nun antigo leito fluvial do cráter Jezero.

“Este achado é o máis preto que estivemos nunca de descubrir vida antiga en Marte”, declarou Nicola Fox, administradora asociada da Dirección de Misións Científicas da NASA.

Matizou, con todo, que non se trata de vida en si mesma, senón dun “sinal residual” que podería ter relación con organismos que existiron hai millóns de anos.

O descubrimento, publicado este mércores na revista Nature, foi ampliado pola NASA nunha conferencia de prensa en que participaron Fox, o administrador interino, Sean Duffy, e outros científicos.

As imaxes presentadas mostran nódulos minerais que poderían formarse en procesos químicos prebióticos ou microbianos, ambos relacionados coa vida.

Katie Scott Morgan, científica da NASA, lembrou que se escolleu o cráter Jezero para a aterraxe do Perseverance en 2021 por atoparse entre os terreos máis antigos de Marte.

“Jezero foi definitivamente o sitio dun antigo lago, con dous vales fluviais de entrada e unha saída pola que fluía a auga”, explicou.

Misión con novas prioridades

Tras anos de exploración, a misión centrouse no afloramento rochoso denominado Bright Angel, onde o Perseverance atopou texturas inusuais e sinais compatibles con restos biolóxicos.

Porén, os expertos subliñaron que será necesario traer as mostras á Terra para determinar con rigor se a orixe é biolóxica.

Esta petición enfronta dificultades polo recorte orzamentario previsto polo presidente estadounidense, Donald Trump, que inclúe renunciar á recuperación de moitas mostras de misións espaciais.

Nicola Fox concluíu que o achado sitúa a NASA “un paso máis preto de responder unha das preguntas máis profundas da humanidade: estamos realmente sós no universo?”.