A xustiza dos Estados Unidos investiga o presidente colombiano, Gustavo Petro

A Xustiza estadounidense está a investigar o presidente de Colombia, Gustavo Petro, por presuntas relacións con narcotraficantes, segundo informa este venres The New York Times, que cita tres persoas familiarizadas co asunto.

O rotativo indica que estas investigacións están centradas, entre outras cuestións, en se Petro mantivo reunións con narcotraficantes ou se solicitou doazóns de traficantes durante a súa campaña presidencial.

As fiscalías de Manhattan e Brooklyn, en Nova York, están a cargo destas pescudas, en que participan fiscais especializados no tráfico internacional de narcóticos e axentes da Administración para o Control de Drogas (DEA) e do Servizo de Investigacións de Seguridade Nacional (HSI), agrega o diario.

O xornal neoiorquino tamén apunta que as investigacións se atopan na súa fase inicial e que se descoñece se algunha delas derivará en cargos penais contra o mandatario.

Ademais, sinala que non hai evidencia de que a Casa Branca favorecese o inicio das devanditas investigacións.

A relación bilateral entre os Estados Unidos e Colombia atravesa tensións desde xaneiro de 2025, tras comezar o segundo mandato do presidente Donald Trump, que deu paso a unha etapa de fortes diferenzas co Goberno colombiano.

A primeira gran crise produciuse ese mes, cando Petro se negou a recibir voos militares estadounidenses con cidadáns colombianos deportados ao considerar que eran trasladados en condicións inhumanas. En resposta, Trump ameazou con impoñer aranceis e sancións económicas contra Colombia.

As discrepancias continuaron durante os meses seguintes, especialmente polo enfoque da loita antidrogas, o que derivou na descertificación de Colombia por parte dos Estados Unidos nesta materia e na imposición de sancións contra funcionarios colombianos, incluído o propio xefe de Estado.

A tensión na relación diminuíu despois dunha chamada que sostiveron Petro e Trump a principios de xaneiro, que deu paso a reunións de alto nivel entre funcionarios de ambos os gobernos e ao encontro que mantiveron o 3 de febreiro. 

Colombia responde que as acusacións "carecen de fundamento"

O Goberno de Colombia respondeu este venres que as acusacións contra o presidente, Gustavo Petro, "carecen de fundamento".

"Ningunha autoridade competente emitiu determinación ou notificación formal algunha, nin confirmou as afirmacións mencionadas no informe. As insinuacións reportadas carecen de fundamento legal e fáctico", declarou a Embaixada colombiana en Washington nun comunicado.

A legación diplomática sinalou que a reportaxe se basea en "fontes anónimas e sen achados concretos", e pediu que sexa lido "no seu contexto completo e coa cautela que ameritan este tipo de versións non verificadas".

Así mesmo, a Embaixada subliñou que, ao longo da súa vida pública, Petro "enfrontou de maneira constante e inequívoca a actividade criminal" e que "a súa traxectoria estivo marcada por unha acción sostida, visible e, a miúdo, complexa contra a ilegalidade, incluíndo a loita contra organizacións criminais transnacionales vinculadas o narcotráfico·.