O empresariado de Ribeira pide máis patrullas da Policía Nacional pola rúa
Reclaman o incremento de axentes dende hai máis de dous anos
Ribeira non é unha vila insegura, pero cómpre o reforzo urxente do persoal da Policía Nacional. É o que vén reclamando dende hai dous anos a Asociación Empresarial de Ribeira (AER).
"Necesitamos que a Policía Nacional estea polas rúas e se con unha dotación non é suficiente, terán que ampliar a dúas. Presumimos agora dunha gran comisaría, que se inaugurou hai dous meses, pero temos unha grande infraestrutura sen persoal", asegura Francisco Martínez, o presidente do colectivo.
A entidade empresarial asegura que a presenza policial é máis necesaria ca nunca despois de que en decembro comezaran a funcionar as novas instalacións da comisaría, situadas nas aforas da vila.
"Ver presenza de patrullas, porque o concello ten unha grande dispersión en parroquias, pero tamén sería fundamental ver presenza policial a pé, polas rúas peonís e polas outras. Iso dá unha seguridade e unha tranquilidade enorme", reclama.
Dende a rúa tamén piden unha maior visibilidade policial, aínda que non existe unha sensación de inseguridade.
A asociación empresarial transmitiu as súas reivindicacións á Subdelegación do Goberno en senllas cartas, e aseguran que continuarán reclamando ata que as rúas de Ribeira conten cun maior número de axentes.
