Os donos da granxa de Rodeiro que perdeu 22 vacas por un raio van reflotala
A cinco anos da xubilación, decidiron seguir adiante coa actividade e xa están buscando animais para comprar
O Concello de Rodeiro e a cooperativa O Rodo puxeron en marcha unha campaña de recadación de fondos para axudalos
Un raio matoulles 22 vacas cando regresaban con elas á casa no lugar de Quintá, en Rodeiro. Aquel raio fatal deixou só tres vacas, pero a Casa Pardo vai ter futuro. A solidariedade e os ánimos que recibiron os donos dende a traxedia foron o impulso definitivo para levantarse e seguir.
"Despois de pensalo ben, decidiron seguir", di o seu veciño Severino. "Nós animámolos moito, e tamén teñen xa feito un investimento en maquinaria e todo", engade. Manolo, primo e veciño do titular da explotación, fala das moitas chamadas e ofrecementos de axuda que tiveron.
"Ata chamou unha señora do País Vasco, que os pais tiveran vacas, e quería mandar cartos", di.
Así que, recuperando os ánimos, Cándido e Julia xa están buscando vacas para comprar. "Necesitan vacas que estean xa en produción, para ir sacando algún carto", di Severino. E que estean afeitas ao réxime de pastoreo, para que se adapten axiña.
O Concello de Rodeiro e a cooperativa da que son socios uníronse para canalizar a vaga de solidariedade que lles chegou nestes días. Abriron unha conta para recoller donativos, e aínda teñen máis axuda agardando na recámara.
"Hai gandeiros que queren doar animais xa en produción, pero témolos en espera ata ver se chega co do seguro e os donativos que xuntemos", di Jesús Montes, presidente do Rodo.
Todos queren axudar e todos celebran a decisión destes gandeiros, coa arela de que recuperen axiña o que é o seu medio e a súa forma de vida.
