Os contribuíntes poderán pedir xa cita de atención telefónica para a declaración da renda

Os contribuíntes poderán empezar a solicitar desde este mércores, 29 de abril, a súa cita previa para a atención telefónica da declaración da renda correspondente ao ano 2025, aínda que será o día 6 de maio cando a Axencia Tributaria comezará a asistir aos cidadáns a través do plan Chamámolo.

Alén da atención telefónica para a confección e presentación de declaracións (plan Chamámolo), a Axencia Tributaria poñerá en marcha o 6 de maio o plan especial de asistencia en pequenos municipios, tamén con solicitude de cita a partir de hoxe, 29 de abril.

Desde o pasado 8 de abril, os contribuíntes poden presentar as súas declaracións a través de internet. O prazo de presentación finalizará o 30 de xuño para declaracións tanto para ingresar como para devolver, aínda que o prazo nas declaracións para ingresar con domiciliación bancaria concluirá o 25 de xuño.

Nesta Campaña de Renda 2025, a Axencia Tributaria prevé ingresar 24.628 millóns de euros, un 18,4 % máis respecto ao exercicio anterior, mentres que o importe para devolver aos contribuíntes será un 3,2 % inferior, con 13.271 millóns. En total, prevense 25.251.000 declaracións, un aumento do 2,1 % respecto ao exercicio anterior, debido ao impulso na creación de emprego rexistrada en 2025.

O plan Chamámolo de confección de declaracións por teléfono manterá a capacidade e calendario dos últimos anos. O pasado exercicio permitiu confeccionar 1.188.000 declaracións e seguiu sendo a vía principal de asistencia personalizada ao contribuínte. Por esta vía, os contribuíntes que requiran asistencia personalizada volven contar cunha potente alternativa á asistencia presencial en oficinas e poden acelerar a presentación e, con iso, a eventual devolución que corresponda.

Unha vez que o contribuínte pide cita (recoméndase a solicitude por internet ou mediante servizo automático no 91 535 73 26) e elixe horario de mañá ou de tarde, o sistema proponlle un día e unha hora na que recibirá a chamada da Axencia Tributaria. En favor da propia axilidade do servizo, resulta moi conveniente que o contribuínte teña dispoñible a información e documentación necesaria para realizar a declaración cando o chame a Axencia.

A atención presencial en oficinas iniciarase o 1 de xuño, con solicitude de cita a partir do 29 de maio. A atención personalizada, por teléfono e en oficinas, seguirá contando co apoio de comunidades autónomas e concellos.

Para a solicitude de cita telefónica e presencial o contribuínte conta cun servizo na Sede electrónica e a aplicación cunha visualización clara e cómoda para a selección da canle de atención e a elección entre as distintas datas dispoñibles. O servizo inclúe, ademais, a posibilidade de filtrar oficinas por códigos postais e informa ao contribuínte da primeira cita dispoñible.