A Axencia Tributaria empeza este luns a atender nas súas oficinas os contribuíntes para a declaración da renda

A Axencia Tributaria empezará este luns a atender nas súas oficinas os contribuíntes que o soliciten para a elaboración das declaracións da renda e patrimonio do exercicio 2025, aínda que xa está aberto o prazo para pedir cita previa. Desde o pasado 8 de abril, os contribuíntes poden presentar as súas declaracións a través de Internet.

Ademais, desde o 6 de maio está en marcha o plan de atención telefónica para a confección e presentación de declaracións (plan 'Chamámolo') e tamén se habilitou ese día o plan especial de asistencia en pequenos municipios. Para a solicitude de cita telefónica e presencial, o contribuínte conta cun servizo na sede electrónica e a app cunha visualización clara e cómoda para a selección da canle de atención e a elección entre as distintas datas dispoñibles.

O servizo inclúe, ademais, a posibilidade de filtrar oficinas por códigos postais e informa o contribuínte da primeira cita dispoñible.

O prazo de presentación finalizará o 30 de xuño para declaracións tanto para ingresar como para devolver, aínda que o prazo nas declaracións para ingresar con domiciliación bancaria concluirá o 25 de xuño.

Nesta Campaña de Renda 2025, a Axencia Tributaria prevé ingresar 24.628 millóns de euros, un 18,4 % máis respecto ao exercicio anterior, mentres que o importe para devolver aos contribuíntes será un 3,2 % inferior, con 13.271 millóns. En total, prevense 25.251.000 declaracións, cun aumento do 2,1 % respecto ao exercicio anterior, debido ao impulso na creación de emprego rexistrada en 2025.

130.000 cartas preventivas para emedar erros do contribuínte

O mesmo que nos dous anos anteriores, a Axencia Tributaria fará un envío de cartas preventivas (alén de avisos en Renda Web e na app no apartado de Estado de Tramitación da Declaración), a contribuíntes que presentaron a súa declaración modificando información achegada pola Axencia, para efectos de que valoren se deben ou non presentar unha declaración complementaria adaptándose á información que lle consta á AEAT. Cunha primeira fase a mediados de maio e unha segunda en xuño prevese remitir preto de 130.000 cartas segundo vaian presentando a súa declaración os contribuíntes.