Os concertos do Xacobeo traerán a Galicia 700 eventos musicais este 2025
O presidente da Xunta dixo na presentación dos concertos en Madrid que son un símbolo do modelo turístico e cultural de Galicia
Alfonso Rueda comprometeu o apoio da Xunta aos festivais e pediulle ao Goberno central que active as exencións fiscais para as empresas colaboradoras co Xacobeo
Máis de 700 artistas porán a música en Galicia este 2025. Dende Kings of Leon e Alanis Morisette ata Tanxugueiras ou Xoel López. Estarán no só nas grandes cidades, senón tamén nas vilas pequenas.
Jorge Álvarez, director de Silfest e do Son da Estación, asegurou que é importante "levalos tamén ao rural, por exemplo o Festival da Luz en Boimorto ou en Valdeorras o SilFest e o Son da Estación".
Alfonso Rueda dixo que cada actuación é unha mostra do atractivo de Galicia: "Galicia a través da súa música é gastronomía, clima e paisaxe, pero tamén é moito máis. É a potencia cultural que sempre estivo aí e que cada vez colle máis nome".
Rueda comprometeu o apoio da Xunta aos festivais e pediulle ao Goberno central que active as exencións fiscais para as empresas colaboradoras: "É un traballo que necesita un apoio e a Xunta vai seguir dándollo, pero necesitamos tamén a axuda doutras administracións, e eu espero que os incentivos fiscais que se nos comprometeron dende xaneiro deste ano e que aínda non chegaron, cheguen canto antes".
Dende o Xacobeo 2021-22, máis de 2,5 millóns de persoas participaron nestes concertos.
