Os comuneiros de Couso, en Gondomar, colaboran cun máster de sostibilidade de Harvard

Os comuneiros de Couso, en Gondomar, son xa un referente mundial polo seu bo facer, teñen recoñecementos da ONU e do Royal College of Art de Londres.

Pero ademais esta semana reciben a visita duns estudantes de Harvard interesados en coñecer o proxecto de sostibilidade que contempla o cultivo de cogomelos, arandos e mesmo un bosque da lingua e da memoria.

Mónica, Serrina, Avery e Scott cursan un máster de sostibilidade na universidade norteamericana de Harvard e coñeceron Couso grazas a un organismo catalán. Están convencidos de que poucas persoas desde sitios pequenos poden facer grandes cousas.

O californiano Scott considera que os bosques son esenciais para loitar contra o cambio climático e niso estes comuneiros son líderes e pioneiros. Para Serrina, natural de Colorado é importante que o resto do mundo vexa Couso como líder para a proteción ambiental.

Nestes días os catro alumnos están coñecendo os importantes proxectos desta comunidade  que iniciou a plantación de cogomelos shiitake, que cultiva froitos vermellos, como os arandos, cos que fai confeituras e que ten ademais un bosque da memoria e outro da lingua en que honran as raíces e os primeiros homes que coidaron destes montes.

En Couso non paran nunca, agora traballan na colocación de 8 niños de paxaros para favorecer a súa reprodución, un proxecto en que colaboran co Instituto do Territorio.