Irán di que atacou dous buques e bases dos EUA en Xordania e 18 petroleiros e barcos

A Garda Revolucionaria Iraniana afirmou este mércores que as súas forzas atacaron dous buques estadounidenses, oito petroleiros e unha decena de barcos no Estreito de Ormuz e a base de Washington en Xordania en resposta aos ataques dos Estados Unidos contra cinco petroleiros iranianos no Golfo Pérsico.

Segundo informou nun comunicado recollido pola axencia Tasnim, vinculada o corpo militar de elite: "En resposta á agresión e as accións hostís do exército terrorista estadounidense contra cinco petroleiros iranianos no Golfo Pérsico, atacou nesta zona dúas embarcacións estadounidenses e oito petroleiros e causoulles importantes danos".

A forza militar iraniana afirmou ademais que atacou outros dez "buques infractores" que, segundo a súa versión, pretendían atravesar unha zona prohibida e insegura do Estreito de Ormuz instigados e apoiados por Estados Unidos.

A Garda non ofreceu máis detalles sobre os buques atacados, pero reiterou que o Estreito de Ormuz permanece baixo a vixilancia e xestión da súa Forza Naval.

Noutro comunicado, o corpo militar informara tamén do lanzamento de mísiles contra a base Al-Azraq, aínda que o exército xordano asegurou que destruíu dezaoito mísiles iranianos que se dirixían contra o seu país, mentres que dous máis caeron en zonas despoboadas.

Estes ataques da República Islámica producíronse despois de que o Comando Central do exército dos EUA asegurase que destruíu cinco embarcacións vinculadas, segundo eles, á Garda, como resposta aos ataques previos de Teherán contra un buque de guerra estadounidense.

A tensión escalou ao redor do Estreito de Ormuz nos últimos días con bombardeos estadounidenses contra territorio e buques iranianos e ataques de Teherán en resposta contra obxectivos e barcos dos EUA en Oriente Medio.

Irán bloqueou o estreito tras o comezo da guerra o 28 de febreiro e converteuno na súa principal medida de presión no conflito.

Estados Unidos, á súa vez, estableceu un cerco a portos e buques iranianos e nas últimas semanas lograra restablecer parte do tráfico marítimo a través do estreito mediante unha ruta meridional próxima a Omán; o tráfico diminuíu nos últimos días tras o cruzamento de ataques, segundo datos da consultora marítima Kepler.