Os cociñeiros apostan por unha horta propia para dar calidade e aforrar en materia prima

Miguel abre unha cancela para acceder á súa despensa particular. Unha horta onde cultiva a maioría das hortalizas, verduras e froitas que precisa para preparar os pratos do seu restaurante, que conta cunha estrela Michelin. 

De colleita propia son tamén os tomates e as cebolas que contén a ensalada que oferta Mari na súa tapería do centro de Ourense.

Poder ofrecer aos clientes produtos co sabor orixinal, coma antano, é un valor moi vixente para Miguel. E Mari mesmo garda as sementes dos mellores exemplares de cara a vindeira temporada.

Pero non só a calidade do produto ou a súa garantía como cultivo ecolóxico fan apostar por ter horta propia. Inflúe tamén a vertente económica, xa que dispoñer de materia prima ao alcance da man sen intermediarios supón un aforro importante nos custos de elaboración dos menús.

Esixe un sobreesforzo baixar o lombo na horta para coller as berenxenas ao tempo que se fai remexer a pota de marmelo nos fogóns. Un traballo extra que aforra cartos aínda que non compute na contabilidade, pero que incrementa a calidade de cada menú que se serve na mesa.