Levántase parcialmente o confinamento das aves de curral; as restricións seguen vixentes en 40 concellos galegos

O Ministerio de Agricultura, Pesca e Alimentación (MAPA) decretou o levantamento parcial do confinamento de aves de curral pola evolución favorable da situación epidemiolóxica da gripe aviaria en España.

A orde, publicada este mércores no BOE, revela que a situación epidemiolóxica mellorou nos últimos 15 días, coa ausencia de detección de casos en aves silvestres, a previsión da subida das temperaturas, xunto coa aplicación das ferramentas dispoñibles de xestión do risco espacial de incursión e presenza do virus da gripe aviaria no medio en España.

¡Buenas noticias!

Tras confirmarse la mejora de la situación de alto riesgo de influenza aviar, levantamos el confinamiento de las aves de corral.

‼️‼️Se mantiene en algunas zonas consideradas de especial riesgo y vigilancia.

Toda la información: ⤵️https://t.co/FsKFtaxnpS pic.twitter.com/y25iPmXTnm

— Ministerio de Agricultura, Pesca y Alimentación (@gobmapa) April 1, 2026

O pasado 13 de novembro, o Goberno ordenou o confinamento de todas as aves de curral que se crían ao aire libre para previr o contaxio por gripe aviaria das aves silvestres ante a previsión de que empeorasen os contaxios polas migracións de aves silvestres. 

O confinamento mantense, en cambio, nas zonas consideradas de especial risco e vixilancia, que comprenden 1.201 municipios de todas as comunidades autónomas, incluíndo Ceuta e Melilla.

En Galicia con 40 concellos. Dunha banda, os declarados como zonas de especial risco: A Illa de Arousa, Cambados, O Grove, Meaño, Ribadumia, Sanxenxo, Vilanova de Arousa, Xove, Cerceda, Ordes e Tordoia. 

Como zonas de especial vixilancia están: Cariño, Dumbría, Mazaricos, Ortigueira, Porto do Son, Rianxo, Ribeira, Vimianzo, Zas, Ribadeo,Trabada, Porqueira, Rairiz de Veiga, Sandiás, Vilar de Santos, Xinzo de Limia, A Guarda, Marín, Meis, Moaña, Poio, Pontevedra, Redondela, O Rosal, Soutomaior, Tomiño, Tui, Vilaboa e Vilagarcía de Arousa.

🪿A restrición mantense, de momento, nas zonas consideradas de especial risco e vixilancia, que en Galicia corresponde a 40 concellos.

👉A pesar deste cambio, lembramos que é preciso seguir evitando o contacto con aves silvestres e comunicar calquera sospeita de enfermidade. pic.twitter.com/jLc9eCd3Sa

— Delegación do Goberno en Galicia (@DelegGobGAL) April 1, 2026

Os focos en granxas

Desde o 1 de xullo de 2025 contabilizáronse en España 16 focos de influenza aviaria en granxas de produción; o último, o pasado 13 de xaneiro na provincia de Lleida.

España xa foi declarada, desde o pasado 10 de febreiro, país libre de influenza aviario de alta patoxenicidade (IAAP) pola Organización Mundial de Sanidade Animal (OMSA), aínda que se mantiñan as medidas de prevención como o confinamento de todas as aves de curral pola situación de alto risco por mor dos movementos de aves migratorias desde zonas de Europa con alta incidencia da enfermidade.

A influenza aviaria afectou principalmente aves silvestres, con 165 focos notificados desde o mes de xullo, alén de seis en aves cativas non destinadas á produción.

Confinamento desde novembro

O 13 de novembro de 2025, o Ministerio decretou o confinamento de todas as aves de curral que se crían ao aire libre en España como medida preventiva de reforzo ante o aumento do risco de expansión da influenza aviaria, enfermidade altamente infecciosa.

A disposición tiña por obxecto evitar posibles contactos entre as aves de granxa e as migratorias que podían ser portadoras do virus.

Unha semana antes decretárase o confinamento das aves de curral nas mencionadas zonas de especial risco e vixilancia.

Desde esa data levouse a cabo un seguimento semanal da situación epidemiolóxica e agora, a teor da evolución da enfermidade en España e nas zonas de orixe dos movementos de aves migratorias e ante a previsión de temperaturas, o Ministerio considerou oportuno levantar o confinamento xeral en todo o territorio nacional.

O Departamento tamén lembrou que, a pesar do levantamento de confinamento, é necesario manter e reforzar as medidas de bioseguridade nas explotacións avícolas para evitar o contacto con aves silvestres, así como reforzar a vixilancia pasiva, tanto nestas como en explotacións avícolas.

Calquera sospeita de enfermidade debe ser notificada aos servizos veterinarios oficiais, en particular no caso das aves domésticas.

Lembrou finalmente que o virus da influenza aviaria non pode ser transmitido ao home a través de carne de ave cociñada, ovos ou produtos procesados derivados deles, pero, en calquera caso, recoméndase minimizar o contacto innecesario coas aves que mostren síntomas clínicos ou se atopen mortas no campo. 

En 40 concellos galegos seguen as restricións

As restricións seguirán vixentes nos 40 concellos galegos en que estaban confinadas antes do peche total, é dicir, os incluídos na zona de especial risco e os da zona de especial vixilancia.

As aves de curral dos 11 concellos da zona de especial risco (ZER) -A Illa de Arousa, Cambados, O Grove, Meaño, Ribadumia, Sanxenxo, Vilanova de Arousa, en Pontevedra; Xove en Lugo e Cerceda, Ordes e Tordoia, na Coruña- xa estaban obrigadas desde o pasado 20 de xaneiro, cando se adoptaron as primeiras medidas preventivas. 

O pasado mes de novembro, as restricións chegaron aos 29 municipios da zona de especial vixilancia (ZEV): A Guarda, Marín, Meis, Moaña, Poio, Pontevedra, Redondela, O Rosal, Soutomaior, Tomiño, Tui, Vilaboa e Vilagarcía de Arousa, en Pontevedra; Cariño, Dumbría, Mazaricos, Ortigueira, Porto do Son, Rianxo, Ribeira, Vimianzo e Zas, na provincia da Coruña; Ribadeo e Trabada, en Lugo; así como Porqueira, Rairiz de Veiga, Sandiás, Vilar de Santos e Xinzo de Limia, en Ourense.