Os Charlíns negan que branqueasen diñeiro do narcotráfico entre 2003 e 2010
Sobre o investimento de 1,9 millóns de dólares na China nunha planta de elaboración e transformación de produtos do mar, María Teresa Charlín dixo: "Fun para facer turismo, para ver ese mundo, que era unha cultura diferente a nós"
En canto á adquisición mediante unha poxa pública dunha depuradora de marisco intervida á familia, asegurou que todo o diñeiro que empregaron para obtela "tivo orixe lícita"
Xuízo na Audiencia Nacional (EFE/Sergio Pérez)
Varios membros da familia dos Charlíns negaron este luns na Audiencia Nacional que participasen en ningunha operativa de branqueo de diñeiro obtido do narcotráfico en Galicia entre 2003 e 2010, unha acusación pola que a Fiscalía pide para eles entre cinco e seis anos de cárcere e multas millonarias.
O clan xa foi condenado por branqueo do tráfico de drogas en 2003, aínda que a Fiscalía cre que, a pesar da condena, os seus membros proseguiron con esa actividade ata 2010, cando se puxo en marcha este novo procedemento que está a ser xulgado estes días na Audiencia Nacional.
Nel figuraron como acusados o patriarca, Manuel Charlín Gama, e o seu fillo Manuel Charlín Pomares, aínda que ambos faleceron en 2021 e 2019, respectivamente.
Os maxistrados escoitaron este luns os testemuños dos fillos de Charlín Gama -María José, María Teresa e Óscar Felipe-, e das súas netas Noemí Outón Charlín e Natalia Somoza Charlín, que rexeitaron de plano toda acusación contra eles. Só Francisco Melchor Charlín se acolleu ao dereito a non declarar.
O resto declarou unicamente a preguntas dos seus avogados e desvinculouse das operacións de branqueo que a Fiscalía inclúe no seu escrito de acusación, como o investimento de 1,9 millóns de dólares en China nunha planta de elaboración e transformación de produtos do mar na cidade de Qingdao, na provincia de Shangdong.
"Fun para facer turismo, para ver ese mundo, que era unha cultura diferente a nós", explicou María Teresa Charlín sobre a súa viaxe á China co seu irmán Melchor, e relatou o seu interese por "ese mundo" nunha época en que estaba a vivir unha situación persoal complicada, e "botaba noites sen durmir vendo as telenovelas turcas, chinesas e de canto país hai".
A Teresa Charlín, que foi absolta de branqueo en 2003, preguntáronlle pola adquisición mediante unha poxa pública dunha depuradora de marisco intervida á familia, e asegurou que todo o diñeiro que empregaron para obtela "tivo orixe lícita".
"Os pagos fixéronse polo banco", dixo, pola súa banda, a súa filla Natalia, a quen foi adxudicada a poxa en 2008.
A Fiscalía cre que, en realidade, Natalia actuou como "simple muller de palla" da súa nai, que era quen "realmente poñía o diñeiro" para a operación e que este procedía do narcotráfico.
A neta de Manuel Charlín tamén negou participar en ningunha operativa de lavado de diñeiro e, cando o seu avogado lle preguntou se ten algunha relación co tráfico de drogas ou co branqueo de capitais, respondeu: "Non, o apelido".
