Obras de emerxencia nun túnel da A-6 en Baralla obrigan ao corte parcial da autovía

O Ministerio de Transportes e Mobilidade Sostible informou do inicio das obras de emerxencia de impermeabilización do tubo do túnel do Neira, no termo municipal de Baralla, o que obrigará a cortar o tráfico desde este martes -19 de maio- na calzada en sentido A Coruña (dereita) entre os quilómetros 463,100 e 464,500.

O período de afectación das obras no túnel, situado no quilómetro 463,800 da autovía A-6, será de aproximadamente tres meses, segundo informou o Ministerio nun comunicado. As obras contan cun orzamento de 528.887 euros e teñen por obxecto emendar os danos causados na impermeabilización do citado tubo do túnel polo temporal de vento que azoutou a zona na tarde do pasado 11 de febreiro.

Con esta actuación instalarase “unha nova lámina impermeabilizante encostada á bóveda para asegurar as condicións idóneas de uso, durabilidade e seguridade da estrutura”.

Para asegurar a fluidez do tráfico durante o tempo no que permanecerá cortada a calzada, será habilitado un paso na mediana, de modo que a circulación continuará pola calzada en sentido Madrid (esquerda) da autovía, que operará en modo bidireccional cun carril habilitado por sentido de circulación.