Vende unha casa de aldea por 2 euros

Chamábanlle a casa do Zar e foi, hai décadas, un taller de costura.

"A casa serve para arranxar se teñen cartos. E teñen que mirar se o Concello dá permiso", explica o dono, José Nieves.

Hoxe só quedan ruínas e unha silveira que lle dá máis traballo que ganancias.

"Quíxenlla doar á vila e non quixeron. O Concello, tampouco, que tiña que ir ao notario e facer unha doazón, e eu non estou disposto a pagarlle a un notario por isto".

Para liberarse desta carga, sacouna á venda por un prezo simbólico de dous euros. A cousa empezouse a animar cando un rapaz da aldea colgou o anuncio nas redes sociais.

"Tiven moitísimas chamadas. Uns de Tenerife ata tiñan o billete comprado, pero eu desanimeinos porque isto non dá nin para o billete de avión".

José aínda vai máis alá. Por un euro máis, ofrece estoutra propiedade, da que só quedan as pedras, onde naceron os seus dez tíos maternos.