O xuíz pide a Interior que informe das viaxes de Begoña Gómez e a súa asesora
Solicita a Moncloa os correos intercambiados na conta da esposa do presidente do Goberno
O xuíz que investiga a Begoña Gómez pediu ao Ministerio do Interior que o informe nun máximo de 10 días das viaxes que a esposa do presidente do Goberno e a súa asesora, Cristina Álvarez, realizasen á República Dominicana, República do Congo, República Democrática do Congo, Guinea Ecuatorial, Guinea Bissau e a Rusia.
Nun auto, recollido por Europa Press, o maxistrado Juan Carlos Peinado diríxese á Oficina Nacional de Información do Pasaxeiro e pide que concreten "as posibles viaxes" efectuadas a eses destinos desde o 16 de xullo de 2018 a día de hoxe. Faino, en concreto, despois de que ambas as investigadas declinaran "a entrega dos seus pasaportes para a comprobación" deste extremo.
Nesa mesma resolución, o instrutor solicita á Secretaría Xeral de Presidencia do Goberno para que, no mesmo prazo de 10 días, remita ao xulgado os correos electrónicos intercambiados e recibidos pola conta asignada a Begoña Gómez desde esa mesma data. Ademais, informa de que será a Unidade Central Operativa da Garda Civil a encargada de analizalos.
O xuíz Peinado critica no seu auto "a escasa ou case nula colaboración coa Administración de Xustiza polas investigadas, en total exercicio dos seus dereitos fundamentais, acolléndose ao seu dereito a non declarar como investigadas, salvo nunha ocasión por parte de Begoña Gómez, que o fixo tan só a preguntas do seu avogado".
"Igualmente, o esposo da citada investigada, actual presidente do Goberno, Pedro Sánchez, cando tivo a oportunidade, de colaborar nesta investigación, acolleuse á dispensa", indica o maxistrado.
O instrutor recoñece que se trata dunha "postura totalmente lexítima", "pero que, como se dixo, a negativa para facilitar os pasaportes conduce a que se haxa de acudirse a outras vías de investigación, como a práctica das dilixencias que agora se acordan, convertendo as mesmas en necesarias e idóneas", engade.
A este respecto, o xuíz asegura que, "aínda que é certo que se poderían acudir a outras, como mesmo a de entrada e rexistro dos domicilios das investigadas, esa dilixencia si que sería desproporcionada".
Cabe lembrar que Peinado investiga a Gómez por cinco presuntos delitos: tráfico de influencias, corrupción nos negocios, apropiación indebida de marca, intrusismo e malversación.
