A policía abate preto de Berlín o presunto autor do atropelo múltiple

 O presunto autor do atropelo múltiple cun morto e 29 feridos contra o Día do Orgullo LGTBI en Berlín foi abatido na localidade de Spandau, nos arredores da capital, durante unha operación policial, informou este domingo o portavoz da Policía de Berlín, Florian Nath.

Nun vídeo en redes sociais, Nath confirmou a noticia que adiantaran varios medios, segundo os cales o fuxitivo, identificado polas autoridades como Abdul Ballout, de 21 anos e nacionalidade alemá, fora neutralizado nunha parcela axardinada dese municipio do arrabalde berlinés.

"Cara ás 18 horas o sospeitoso do atentado no parque Tiergarten foi localizado nunha zona de parcelas axardinadas en Spandau. O sospeitoso achegouse correndo cunha arma branca cara aos nosos efectivos", que abriron fogo, indicou o portavoz.

"O sospeitoso sufriu feridas tan graves que, aínda que puido ser reanimado por médicos de emerxencias, faleceu no mesmo lugar dos feitos", agregou.

Ballout permanecía fuxido desde que supostamente cometeu o atropelo e a policía non lograra atopalo na vivenda que compartía coa súa familia no centro de Berlín nin noutros lugares que foron examinados.

Segundo informou a Fiscalía, Ballout contaba con antecedentes por lesións e roubo e en maio deste ano fora condenado a un ano e dez meses de prisión por intentar unirse ao grupo xihadista Estado Islámico (EI) en Siria.

Quedara en liberdade condicionada mentres a xustiza resolvía o recurso da Fiscalía, que pedía unha pena máis longa, e estaba a participar namentres nun programa de desradicalización.

Non se descartou aínda que Ballout contase con cómplices dalgún tipo e a policía arrestou a varias persoas da súa contorna para ser interrogadas, aínda que aínda non hai informacións oficiais sobre o seu posible papel no atentado