O TSXG confirma a sentenza de 23 anos de cárcere para o home que asasinou a súa parella na Coruña
Foi declarado culpable dun asasinato consumado
Confirmouse que acoitelou a falecida co propósito de rematar coa súa vida
O condenado durante o xuízo (M. Dylan/Europa Press)
A Sala do Civil e Penal do Tribunal Superior de Xustiza de Galicia (TSXG) confirmou a sentenza da sección segunda da Audiencia Provincial da Coruña en que condenaban a 23 anos de prisión o home detido por asasinar a súa parella no barrio coruñés do Birloque no 2021.
Ao acusado adxudícanselle delitos de asasinato consumado, coa concorrencia das circunstancias agravantes de parentesco e xénero.
Tamén se lle impuxo a prohibición de aproximarse e comunicarse cos fillos e co pai da vítima durante 30 anos.
O Tribunal do Xurado considerou probado que o home mantivo unha discusión coa súa parella na noite do 14 ao 15 de setembro, motivada pola decisión da muller de querer terminar coa relación.
O home non aceptou esa decisión, advertíndoa de que "se ía arrepentir". Na tarde do día seguinte o condenado accedeu á vivenda da falecida.
Tamén se probou que lle atestou varias coiteladas co propósito de acabar coa súa vida, sen que ela puidese ter posibilidade de reaccionar nin defenderse do ataque.
