O TS condena a 36 anos de prisión o hostaleiro vigués acusado de abuso sexual a 16 menores

A Sala do Penal do Tribunal Supremo confirmou a condena a 36 anos de prisión imposta ao hostaleiro vigués coñecido como Papuchi, propietario dun restaurante en Vigo, declarado culpable de varios delitos de abusos sexuais a 16 menores cos que contactaba a través das redes sociais, entre os anos 2015 e 2017.

O tribunal desestimou o recurso interposto polo condenado contra a sentenza do Tribunal Superior de Xustiza de Galicia (TSXG). De feito, confirmou a ditada pola Audiencia Provincial de Pontevedra que, ademais, condenoulle ao pago dunha indemnización de 17.500 euros ás súas vítimas.

Os feitos probados recollen que a explotación do local permitía ao condenado contactar con menores de idade, que consideraba que eran “máis facilmente maleables”, aos que expuña os seus propósitos sexuais a cambio de consumicións de comida e bebida gratis no seu establecemento. Tamén os convidaba ao seu domicilio, a paseos nos coches que utilizaba, levábaos a partidos de fútbol do Celta de Vigo, a discotecas ou a pasear no seu barco.

Para contactar con eles, utilizaba Instagram, WhatsApp ou Snapchat, plataforma esta última na que, para gañar a confianza das súas vítimas, o condenado asumía un comportamento de adolescente e enviaba fotos súas espido.

A sentenza engade que “o que leva a cabo o recorrente é obter o consentimento cunha despregadura de medios, de actividade, de agasallos e todas as circunstancias que o recorrente ofrecía ás vítimas para que accedesen á relación sexual, elementos dos que se prevalía para alcanzar a aceptación nas prácticas sexuais”.

E sinala que “non se trataba só da diferenza de idade que existía entre 24 e 27 anos entre o recorrente e vítimas, senón o elenco de circunstancias que el lles ofrecía e ás que os menores non accederían en circunstancias normais, pero que el exhibía e facilitaba para conseguir o consentimento aos actos sexuais declarados probados”.