A xuíza pide a Defensa que informe de se buques marroquís entraron en augas españolas

A xuíza da Audiencia Nacional María Tardón requiriu ao Ministerio de Defensa que a informe de se entre os días 29 de xullo e 10 de agosto buques de guerra ou embarcacións militares de Marrocos entraron en augas territoriais españolas adxacentes a Ceuta.

Nun auto difundido este mércores, Tardón amplía as dilixencias que solicita no marco da investigación xudicial da entrada irregular de migrantes á cidade autónoma de Ceuta que tivo lugar os días 29 e 30 de xullo.

En concreto, Tardón pide ao Estado Maior da Defensa que informe de se entre o 29 de xullo e o 10 de agosto se produciu "a entrada, permanencia, tránsito ou presenza en augas territoriais españolas, adxacentes á cidade de Ceuta, de buques de guerra ou embarcacións militases pertencentes á Armada do Reino de Marrocos".

Tamén, de se esta presenza motivou "algún tipo de acción, reacción, aproximación ou interacción" destes coa Armada ou outra unidade militar española, e que facilite, no caso de que existisen, "gravacións desas posibles estancias e/ou permanencia de buques pertencentes á Armada de Marrocos nas referidas augas españolas".

Igualmente, a xuíza quere saber se desde o 10 de agosto ata hoxe volveu producirse "a incursión dalgún buque da mesma procedencia nas referidas augas españolas", e, no caso de que fose así, en que circunstancia se produciu.

A pesar de solicitar esta información, a xuíza deixa claro no seu auto que, "polo momento, non existe elemento obxectivo algún que permita afirmar que unha eventual presenza de unidades navais marroquís en augas territoriais españolas adxacentes á Cidade de Ceuta tivese participación, intervención, colaboración ou relación causal" coa entrada masiva de migrantes.

Ata a data, explica, "non consta dato algún incorporado á causa" que permita soster que a actuación de buques de guerra da Armada do Reino de Marrocos "formase parte do mecanismo de organización, facilitación ou execución de tales feitos".

Descarta ademais algunhas das medidas solicitadas pola acusación popular formulada polo partido político Iustitia Europa ao consideralas "desproporcionadas" xa que, entre outras, reclamaban impedir o borrado, a sobreescritura ou a destrución dos rexistros do radar.

Segundo un informe do Centro Nacional de Intelixencia (CNI) remitido á xuíza a semana pasada, Marrocos coñecía previamente que se estaba preparando a entrada masiva de migrantes a Ceuta os días 30 e 31 de xullo e as súas autoridades "eran plenamente conscientes de que se ía producir ese fluxo".

O informe remitido á maxistrada que instrúe a causa sobre a entrada de máis de 70.000 persoas eses días na cidade autónoma afirma que as autoridades marroquís coñecían "con detalle" a existencia de convocatorias en redes sociais, "cun gran seguimento" por parte dos seus usuarios, que chamaban a esa entrada coincidindo coa Festa do Trono.