Un detido nas cargas policiais na Coruña contra manifestantes de extrema esquerda nun acto de Abascal

A praza de María Pita da Coruña viviu este mediodía unha auténtica batalla campal. Ata tres grupos distintos de extrema esquerda, entre eles Galiza Nova, as xuventudes do BNG, tentaron boicotear un acto de precampaña de Vox. Algúns dos concentrados guindaron pedras e mesmo cadeiras contra a policía, que tentaba desaloxar a zona. Hai polo menos un detido.

Máis dun milleiro de persoas concentráronse en protesta pola presenza do líder de Vox, Santiago Abascal, nun acto na céntrica praza coruñesa, onde se viviron momentos de tensión con disturbios e cargas policiais.

Tras un cordón policial formado por máis dunha ducia de furgóns da Policía Nacional, os manifestantes, convocados por organizacións estudantís, Galiza Nova e o Sindicato de Inquilinas, entre outras, situábanse nas proximidades do Concello, mentres que o acto de Vox celebrábase na entrada á praza por Porta Real.

Desde as 11:00 horas, os mozos berraban consignas como "A Coruña é antifascista" ou "Non sodes nada sen a policía", entre outras, sen que se producisen incidentes ata que ao finalizar o acto de Vox houbo un encontrón entre policía e manifestantes que derivou nunha carga nunha das zonas da concentración.

En declaracións aos medios, o secretario xeral de Galiza Nova, Artai Gabiás, reivindicou que "os discursos de odio que lanza" a formación de Santiago Abascal "non son ben recibidos en Galicia". "O seu odio e o seu racismo son unha estratexia para dividir ás clases populares. Os problemas non son os migrantes é o fracaso do sistema capitalista", subliñou Gabiás.

Durante o acto, preguntado pola protesta, Santiago Abascal defendeu que "non hai coacción" que poida con eles, asegurando que a presenza dos manifestantes non lles dá "ningún medo".

Así mesmo, reivindicou que cun cambio de Goberno "non será posible acosar os cidadáns e acudir ás prazas para impedir que a xente poida expresarse en liberdade".