O Tribunal Superior dálle a razón á Xunta con outros dous parques eólicos

O Tribunal Superior de Xustiza de Galicia (TSXG) ditou dous fallos favorables á Xunta respecto aos parques eólicos de Treboada e Couto da Mina, nas provincias de Lugo e Ourense, que se unen á sentenza coñecida a semana pasada sobre o de Bustelo (A Coruña).

O alto tribunal explicou que a sección terceira da sala do contencioso-administrativo confirmou os acordos do Goberno galego que declararon a utilidade pública e a compatibilidade con diversos aproveitamentos forestais das instalacións de ambos os proxectos.

No caso do parque de Treboada, situado en San Xoán de Río, Castro Caldelas, Chandrexa de Queixa, A Pobra de Trives (Ourense) e Ribas de Sil (Lugo), a sala entende que a asociación ecoloxista recorrente si ten lexitimación para cuestións ambientais, pero destaca que non pode reabrirse neste proceso o debate sobre a autorización de construción previa, que non foi impugnada no recurso.

O TSXG conclúe que a parte recorrente non acredita titularidade nin interese singular sobre as parcelas afectadas pola expropiación e por iso carece de lexitimación para impugnar a relación de bens a expropiar, e engade que os argumentos achegados, vinculados á adecuación do proxecto e a impactos ambientais, non permiten invalidar o acordo impugnado.

En canto a Couto da Mina, situado no Irixo e Piñor (Ourense), a sala aprecia que a declaración de utilidade pública e a tramitación esixida pola normativa sectorial e expropiatoria non foron vulneradas de forma que caiba anular o acordo impugnado, polo que desestima o recurso interposto por unha asociación ecoloxista.

Ningunha das dúas sentenzas son firmes, pois pódese interpoñer recursos de casación.

A semana pasada coñeceuse que o TSXG autorizou a construción do parque eólico de Bustelo, en Coristanco e Carballo, alén de denegar a suspensión cautelar de autorizacións administrativas e a declaración de utilidade pública do parque Couto Muíño, en Vimianzo e Zas (A Coruña).

Estas sentenzas prodúcense despois de que se modificase a composición desa sala do tribunal, que ata entón paralizara decenas de parques eólicos, mediante o polémico traslado forzoso de catro maxistrados.

A conselleira, que se reuniu este martes con representantes da Asociación Eólica de Galicia (EGA), celebrou hoxe a sentenza sobre Bustelo, porque non se limita a aplicar a doutrina establecida polo Tribunal Supremo e as autoridades xudiciais europeas que avalan a tramitación fragmentada dos proxectos, senón que analiza tamén en profundidade toda a documentación e informes da avaliación ambiental.

Vázquez e os representantes de EGA cren que estas últimas decisións xudiciais poidan "marcar un cambio de tendencia" para o sector, e consideraron urxente desbloquear a situación.

Vázquez defendeu que tamén é importante a repotenciación dos parques xa operativos para mellorar a súa eficiencia e indicou que actualmente están autorizadas nove operacións deste tipo e hai outras dez en tramitación.