O torneiro Aitor Martínez e a Fundación Artesanía de Galicia, Premios Nacionais de Artesanía

Concedidos polo Ministerio de Industria e Turismo, os Premios Nacionais de Artesanía divídense en cinco categorías, e en dúas acabou habendo triunfo galego. 

Triunfo galego na categoría Premio Produto para Aitor Martínez pola súa colección Mundos. Do torneiro de Tomiño destacou o xurado a súa gran sensibilidade técnica e potente visión conceptual.

"Como pai e como artesán, o máis bonito que me pasou na vida é que alguén recoñeza o meu traballo e que poida facelo diante das miñas fillas, ás que levo catro anos dicindo que traballar en algo que che gusta paga a pena, que poñer corazón no que fas faite máis feliz e fai máis feliz a xente que está contigo", dixo o artesán no seu agradecemento

E triunfo galego tamén na categoría Premio Promociona para Entidades Públicas. Levou o galardón a Fundación Artesanía de Galicia polo seu proxecto Artesanía no Prato. 

"Unha alegría que nos dá o sector artesán galego a través da Fundación Artesanía de Galicia. Son preto de 800 artesáns", destacou o director xeral de Comercio e Consumo, Gabriel Arén

Obtivo ademais un diploma de finalista Sandra Vilas, do obradoiro compostelán Boina Galega, pola súa empresa Claudinas, feltros esculpidos e artesanais. 

"Tedes que comprar artesanía e dicirlle á xente que compre artesanía", insistiu ante o micrófono Aitor Martínez

Un recoñecemento ao traballo de quen preserva e actualiza os oficios artesáns.