O Sergas publica unha oferta de 423 prazas de difícil cobertura
O método de adxudicación será o concurso, e o 25 por cento estará reservado para promoción interna
Médico nunha consulta
O Servizo Galego de Saúde (Sergas) publicou este mércores unha oferta de emprego público orientada a 423 prazas de difícil cobertura mediante o sistema de concurso e cun 25 % delas reservadas para promoción interna.
O Diario Oficial de Galicia publica o decreto da Consellería de Sanidade cunha serie de prazas para especialistas en Cee, O Barbanza, A Mariña, Monforte de Lemos, Verín, O Barco de Valdeorras e O Salnés.
Atención primaria
Tamén inclúe prazas de especialistas en atención primaria -aínda que a Xunta manifestou en numerosas ocasións que non hai persoas dispoñibles nesta categoría- e pediatría de atención primaria; ademais de especialistas en psiquiatría e psicoloxía clínica e enfermería de saúde mental.
O decreto inclúe a aquelas persoas da área de saúde mental que obteñan o seu título de especialista durante o mes de maio. Son 423 prazas nunha "oferta parcial e anticipada á correspondente á taxa ordinaria do persoal estatutario do Servizo Galego de Saúde para o ano 2023".
O método para a súa adxudicación será o concurso e un 25 % das prazas están reservadas para promoción interna, xunto con outras 22 reservadas para discapacidade. O decreto, que asina Francisco Conde ante a ausencia do presidente, Alfonso Rueda, aplicarase en función das normas precisas que dite posteriormente a Consellería.
