O Sergas prevé optimizar a eficiencia da atención primaria coa extensión do sistema XIDE

No novo modelo de Xestión Integral de Demanda (XIDE) que ensaia o Sergas, ben presencialmente no mostrador ou ben de forma telefónica, os usuarios responden voluntariamente dúas preguntas simples que serven para derivalos ao profesional sanitario ou administrativo que poida resolver a súa consulta con máis eficiencia. 

Trátase de liberar os facultativos de tarefas administrativas ou de enfermería que non requiren especificamente da actividade médica.

 "E doutras que non son de motivo administrativo, pero que son actividades de seguimento que comezou o médico de familia e que poden ser realizadas por outros profesionais de xeito moi eficiente, por exemplo, un técnico de saúde ou un farmacéutico", explica Estrella López, directora xeral de Planificación e Reforma Sanitaria.

Tamén serve este sistema para determinar a prioridade de cada caso, se se trata dunha emerxencia ou a atención pode ser adiada dous ou tres días.

"Encamiñando adecuadamente esta demanda, os profesionais estan máis satisfeitos, porque descargan tarefas que non lles achegan ningún valor engadido", engade a directora xeral.

A proba piloto demostrou por exemplo que o 60 % da carga de traballo dos médicos son para resultados de analíticas que están ben, para renovar as receitas de sempre a enfermos crónicos, ou traballos administrativos como baixas ou informes que poderian ser asumidas por outros profesionais.

A proba piloto comezou en novembro, antes da sexta onda, e foi probada tamén durante o pico de demanda. Pretende axendar e optimizar o traballo dos profesionais dos centros sanitarios e facelo máis proactivo.

Persegue por exemplo, que un paciente non teña que ir tres veces ao centro de saúde nunha semana, senón resolver os seus problemas nunha única visita. Tamén prevé unha dixitalización de procesos como informes que se poden tramitar telematicamente.