O dono de Sargadelos impón un ERTE de 15 días a 86 empregados e di que dimite das súas "funcións executivas"

O dono de Sargadelos, Segismundo García, notificou aos representantes dos traballadores o inicio dun procedemento de regulación temporal de emprego (ERTE) por forza maior con efectos desde o 27 de novembro e ata o 15 de decembro e un total de 86 persoas afectadas.

Ao mesmo tempo, e segundo informa o propio Segismundo García á prensa, o propietario da histórica firma comunica ao Xulgado do Mercantil número 2 da Coruña a súa "dimisión como xestor ou CEO" da fábrica de cerámica da que se fixo cargo no ano 2014, estando en situación concursal.

Afirma que a "chulería" da inspección de traballo "obrígao " a "cesar nas funcións executivas que viña realizando" con data deste mesmo venres.

As traballadoras agardaban ás portas da fábrica

As traballadoras de Sargadelos permaneceron ás portas da fábrica de Cervo desde primeira hora da mañá, dado que non puideron acceder aos seus postos de traballo ao atoparse o acceso pechado, segundo confirmou a EFE o responsable da CIG na Mariña, Xorxe Caldeiro.

“A situación é a esperada desde onte. A porta está pechada para as traballadoras e están todas aquí fóra, desde as sete e cuarto da mañá, esperando a que alguén se digne en explicarlles porque están outra vez expulsadas do seu traballo”, dixo Caldeiro.

Esperando, precisou, a saber “cal é a causa deste peche patronal” e tamén pendentes de “haber quen actúa, as autoridades laborais, a Inspección de Traballo... Están pendentes da ver que sucede esta vez”, sinalou.

Recoñece que esta situación volveu a provocar moita “inquietude e malestar” entre o persoal, porque “non é a primeira vez que pasan por isto”.

“É un abuso de tal magnitude que non ten nome. O que están a facer con elas é absolutamente impresentable”, lamentou.

O propietario de Sargadelos, Segismundo García, volvía ordenar este xoves o desaloxo da fábrica de Cervo por parte do persoal e a suspensión da produción por mor da visita realizada por inspectores de Traballo ás instalacións.

"Foron pola fábrica e, cando os viu, ordenou desaloxar as instalacións de produción", dixo Caldeiro, quen tamén precisou que se mantiveron no seu posto os traballadores de administración e persoal de mantemento.

"Trátase doutro episodio máis desta historia interminable", lamentou o responsable sindical, que considerou que se volve "á mesma situación e coa mesma falta de argumentos" por parte do propietario.

CCOO pide que outra empresa asuma Sargadelos e subrogue os traballadores

O responsable de Industria de CCOO na Mariña, José Antonio Zan, pediu á Xunta que busque a outra empresa para que asuma o negocio e subrogue o persoal de Sargadelos.

“Isto é como o patio do colexio, cando lle entra a choreira ao señor Segismundo, despide a todo o mundo. Cada vez que vén a Inspección de Traballo, despide a todo o mundo”, dixo Zan a EFE.

Ao seu xuízo, “a culpa tena Emprego”, porque “a primeira vez tíñalle que parar os pés, pero como non o fixo, veuse arriba e agora volve co mesmo”.

“Que van inventar agora, descoñecémolo”, indicou o portavoz sindical, porque “se Segismundo ameaza con despedir a todo o mundo, o mellor é que se busque unha empresa que subrogue todos os traballadores, que colla a custo cero a fábrica de Sargadelos e que tire para adiante”.

“Para seguir cun individuo que cada vez que lle entra a perrencha despide a todo o mundo, é mellor que os traballadores teñan un pouco de paz e de calma á hora de ir traballar, para gañarse un salario e facer o seu labor, que é preciosa”, asegurou.

A Xunta insta o propietario a retomar a actividade

Pola súa banda, o Goberno galego instou a dirección de Sargadelos a que renove “canto antes” a actividade na fábrica.

Nun comunicado, lembrou que, "como autoridade laboral, o Goberno galego, como non pode ser doutra forma, velará polo cumprimento da lexislación laboral e denunciará calquera ilegalidade que sexa detectada".