O dono de Sargadelos dimite das súas "funcións executivas" e impón un ERTE que a Xunta ve "incongruente"

O dono de Sargadelos, Segismundo García, notificou aos representantes dos traballadores o inicio dun procedemento de regulación temporal de emprego (ERTE) por forza maior con efectos desde o 27 de novembro e ata o 15 de decembro e un total de 86 persoas afectadas.

Ao mesmo tempo, e segundo informa o propio Segismundo García á prensa, o propietario da histórica firma comunica ao Xulgado do Mercantil número 2 da Coruña a súa "dimisión como xestor ou CEO" da fábrica de cerámica da que se fixo cargo no ano 2014, estando en situación concursal.

Respecto desta decisión de dimitir, García afirma nun escrito que se debe á "chulería" da inspección de traballo, que o "obriga" a "cesar nas funcións executivas que viña realizando" con data deste mesmo venres.

Na actualidade, Sargadelos xa non está en concurso de acredores -saíu en 2016- e o propio García traslada no escrito para o xulgado que a planta "satisfixo a totalidade dos créditos privilexiados e abonou a práctica totalidade dos créditos ordinarios devindicados ata a data".

"Déixase unha empresa sen débedas, con ampla e recorrente tesourería, prestixiada no mercado e en plena época de expansión", manifesta quen, en todo caso, continúa sendo o dono da factoría.

Un novo pulso coa Inspección de Traballo

Segismundo García, que en abril mantivo un pulso coa inspección de traballo por mor dun expediente aberto tras detectarse que varias traballadoras desenvolveran silicoses en Cervo, volveu paralizar a actividade este xoves.

Fíxoo tras unha nova visita de tres inspectores, que acudían a comprobar o estado das instalacións pasado o prazo determinado para que se executaron as mellorías requiridas para incrementar a seguridade laboral na fábrica.

Como o edificio está declarado como ben de interese cultural (BIC), Traballo deu un prazo máis amplo para as actuacións que implicaban obras no mesmo, e a Xunta comprometeu a Segismundo García colaboración para que saísen adiante.

Outro peche

Este venres á primeira hora, os traballadores de produción acudiron ao seu posto de traballo -como en abril- e atoparon as portas pechadas. Asinaron un rexistro para deixar constancia de que acudiran e permanecen ás portas de Sargadelos, en cuxo interior si se atopan os empregados de oficina e mantemento.

Sen a presenza da Garda Civil -que si estivo en abril-, o desconcerto, o malestar e a sensación de desamparo esténdese entre o persoal de produción, que non entende a decisión do ERTE no momento que vive Sargadelos, que contratou persoal nos últimos tempos e aberto unha tenda en Barcelona, entre outras medidas.

Pola súa banda, o dono de Sargadelos chegou este venres antes do que adoita ser habitual, sobre as 8:40 horas, e accedeu á planta sen falar coas traballadoras. Arredor das 11:30 horas deixou o lugar.

Na súa carta de "dimisión", critica a "abundantísima e, ás veces, contraditoria lexislación e normativa de todo tipo", pero carga "sobre todo" coa do ámbito laboral, así como "coa altanería, engreimento e chulería da inspección de traballo".

O ERTE

En canto ao ERTE, refírese á "paralización obrigada da produción tras as actuacións e requirimentos formulados pola inspección de traballo e seguridade social en relación con posibles riscos asociados ao po de sílice en determinados postos de traballo, que, de existir, poden ser prexudiciais para a saúde dos traballadores".

"Tal situación obríganos a interromper (confiemos que temporalmente) a actividade produtiva nas áreas afectadas (produción) para garantir plenamente a seguridade e saúde do persoal", afirma. "Esta situación constitúe unha causa de forza maior nos termos previstos na normativa laboral", engade.

Por iso, a empresa procedeu a solicitar a autorización do ERTE por forza maior ante a autoridade laboral, segundo indica. "Unha vez recaia resolución e se concreten as medidas, comunicarase aos afectados", apunta.

En concreto, son oito homes e 78 mulleres, segundo recolle o expediente, presentado no rexistro da Xunta este venres á primeira hora, segundo consta na documentación remitida por Segismundo García aos medios de comunicación.

A firma desta documentación por parte dunha das traballadores provocou momentos de crispación entre un persoal que carece de representación oficial desde hai anos.

Rueda pide "seriedade" e "cumprir a lei" ante o ERTE de Sargadelos

O presidente da Xunta, Alfonso Rueda, pediu "seriedade" e "cumprimento da lei" tras coñecerse o ERTE de Sargadelos.

Neste contexto, afirmou que a Xunta tentará mediar no conflito, como xa fixo na primavera nun primeiro intento de peche. "Tentaremos facer o papel que nos levou á solución, pero tamén somos conscientes das nosas capacidades como autoridade laboral e esixiremos o cumprimento da lei", respondeu a preguntas dos medios.

O presidente lembrou que, cando se produciu un conflito, a Xunta tentou mediar para "chegar a unha solución": "Nese momento conseguímolo e agora tentaremos facer o mesmo". Para iso, asegurou que tomará as decisións que lle "correspondan como Xunta de Galicia".

"Non creo que sexa un bo final calquera outro que non implique continuidade do traballo normal da fábrica", engadiu.

A Xunta ve "incongruente" o ERTE e insta á reanudación inmediata da actividade en defensa dos traballadores. Como autoridade laboral, o Goberno galego aprecia incongruencia na solicitude presentada ao non axustarse á normativa aplicable, e demanda información e documentación adicional á dirección da empresa.

Así mesmo, reafirma que velará polo cumprimento da lexislación laboral e denunciará calquera ilegalidade que se detecte.

 

A CIG cualifica a situación de "abuso"

O portavoz da CIG Xorxe Caldeiro, que en abril e agora acudiu ata a fábrica para acompañar e asesorar aos traballadores, criticou, en declaracións a Europa Press, o "despropósito" que achaca a unha "improvisación sobre uns desvaríos" do dono de Sargadelos.

“A situación é a esperada desde onte. A porta está pechada para as traballadoras e están todas aquí fóra, desde as sete e cuarto da mañá, esperando a que alguén se digne en explicarlles porque están outra vez expulsadas do seu traballo”, dixo Caldeiro.

Esperando, precisou, a saber “cal é a causa deste peche patronal” e tamén pendentes de “haber quen actúa, as autoridades laborais, a Inspección de Traballo... Están pendentes da ver que sucede esta vez”, sinalou.

Recoñece que esta situación volveu a provocar moita “inquietude e malestar” entre o persoal, porque “non é a primeira vez que pasan por isto”.

“É un abuso de tal magnitude que non ten nome. O que están a facer con elas é absolutamente impresentable”, lamentou.

"Trátase doutro episodio máis desta historia interminable", lamentou o responsable sindical, que considerou que se volve "á mesma situación e coa mesma falta de argumentos" por parte do propietario.

CCOO pide que outra empresa asuma Sargadelos e subrogue os traballadores

O responsable de Industria de CCOO na Mariña, José Antonio Zan, pediu á Xunta que busque a outra empresa para que asuma o negocio e subrogue o persoal de Sargadelos.

“Isto é como o patio do colexio, cando lle entra a choreira ao señor Segismundo, despide a todo o mundo. Cada vez que vén a Inspección de Traballo, despide a todo o mundo”, dixo Zan a EFE.

Ao seu xuízo, “a culpa tena Emprego”, porque “a primeira vez tíñalle que parar os pés, pero como non o fixo, veuse arriba e agora volve co mesmo”.

“Que van inventar agora, descoñecémolo”, indicou o portavoz sindical, porque “se Segismundo ameaza con despedir a todo o mundo, o mellor é que se busque unha empresa que subrogue todos os traballadores, que colla a custo cero a fábrica de Sargadelos e que tire para adiante”.

“Para seguir cun individuo que cada vez que lle entra a perrencha despide a todo o mundo, é mellor que os traballadores teñan un pouco de paz e de calma á hora de ir traballar, para gañarse un salario e facer o seu labor, que é preciosa”, asegurou.