O prezo do gasóleo e a gasolina marca un novo récord por terceira semana consecutiva

A gasolina marcou un novo récord, por terceira semana consecutiva, tras subir un 1,1 % no últimos sete días, mentres que o gasóleo encareceu un 1,3 %, para bater o máximo histórico vixente desde setembro de 2012.

Segundo os datos difundidos este xoves polo Boletín Petroleiro da Unión Europea, a gasolina véndese esta semana en España a unha media de 1,575 euros o litro, mentres que o gasóleo o fai a 1,462 euros.

Tras estas novas subidas, a gasolina sitúase por encima do seu prezo récord de 1,558 euros o litro mentres que o gasóleo supera nun 1,2 % o seu máximo anterior de 1,445 euros. 

Encher un depósito medio de 55 litros con gasolina custa preto de 87 euros, mentres que con gasóleo supera os 80 euros.