O Porriño esquece a liga para xogar todas as cartas na final da EHF European Cup
Coa eliminatoria diante do Elxe moi costa arriba dosificou a todas as titulares e caeu na volta dos cuartos de final (19-30)
O Conservas Orbe Zendal Porriño só ten ollos para a volta da final da EHF European Cup, partido que xogará esta fin de semana en Islandia diante do Valur (29-29 na ida). Despois de facer un bo torneo ligueiro e ter vantaxe de campo na eliminatoria contra o Elxe, os caprichos do calendario meteron a eliminatoria entre os dous partidos da final europea e a atención non puido ser a axeitada.
Isma Martínez reservou boa parte das titulares e o parcial de inicio dun Elxe, que xa gañara na ida por once goles, resultou contundente: 0-6. A partir de aí o equipo alacantino xogou con moita tranquilidade diante dun Porriño que en ningún momento apertou o acelerador. Ao descanso o marcador deixábanos un 6-15 e a diferenza chegou a estar bastantes minutos do segundo tempo por riba dos 10 goles. O resultado final foi de 19-30.
O Elxe será o rival do Mecalia Guardés na eliminatoria de semifinais que comezará o vindeiro mércores.
