O paro sobe en 70.744 persoas no mes de xaneiro e destruíronse 215.000 empregos

A Seguridade Social perdeu en xaneiro 215.047 afiliados de media tras a fin da campaña do Nadal, mentres que o paro repuntou en 70.744 persoas nun mes habitualmente malo para o mercado laboral.

Segundo informou o Ministerio de Inclusión, Seguridade Social e Migracións, a caída de xaneiro é similar á doutros arranques do ano e deixa o total en 20.081.224 afiliados. En canto ao desemprego, o Ministerio de Traballo destaca que o incremento é inferior á media para ese mes e sitúa o total de desempregados en 2.908.397. O que si mellora é a calidade do emprego, co 45% dos novos contratos, indefinidos.

En Galicia subiu algo menos que a media e hai 2.826 parados máis

A Seguridade Social perdeu en xaneiro en Galicia 11.525 afiliados de media, mentres que o paro repuntou en case tres mil persoas, 2.826, nun mes habitualmente malo para o mercado laboral. A menor cifra para este mes de toda a serie histórica, segundo explicou a conselleira de Emprego.

Segundo informou o Ministerio de Inclusión, Seguridade Social e Migracións, a caída de xaneiro, do 1,11 %, deixa o número total de afiliados en 1.030.738 na comunidade autónoma. En canto ao desemprego, o Ministerio de Traballo indica que o número total de parados en Galicia no mes de xaneiro se situou en 145.048 persoas.