O Parlamento pide por unanimidade asumir a xestión de aeródromos e heliportos galegos
Fai referencia ás infraestruturas destinadas a aeronaves ultralixeiras, hidroaeródromos e heliportos, distintas dos aeródromos de uso público en que se realizan operacións de transporte de pasaxeiros, mercadorías ou correo
Imaxe de arquivo do aeródromo de Rozas, en Castro de Rei
O Parlamento de Galicia aprobou por unanimidade unha proposición non de lei na que solicita acordar co Goberno central o traspaso dos recursos precisos para asumir a xestión dos aeródromos e heliportos galegos que non teñan a cualificación de interese xeral do Estado.
Con esta finalidade, reclama a convocatoria da Comisión Mixta de Transferencias para traspasar os recursos humanos, materiais e económicos necesarios.
En concreto, a iniciativa fai referencia ás infraestruturas destinadas a aeronaves ultralixeiras, hidroaeródromos e heliportos, distintas dos aeródromos de uso público nos que se realizan operacións de transporte comercial de pasaxeiros, mercadorías ou correo, incluídos os servizos de aerotaxi.
A iniciativa, impulsada polo PPdeG foi defendida pola deputada Katy Varela, que lembrou que o Estatuto de Autonomía recolle que a Comunidade galega asume a competencia exclusiva en materia de aeroportos e heliportos non cualificados de interese xeral polo Estado e os aeroportos deportivos, “aínda que ata este momento non as estaba exercendo”.
Segundo a iniciativa, "este tipo de centros de control aéreo permitirá continuar coa senda iniciada de potenciar o sector aeroespacial en Galicia".
