O papa pídelle á mocidade que sexa a "chispa dunha humanidade nova"

O papa León XIV pediulle este sábado á mocidade en Madrid que sexa "a chispa" dunha humanidade nova ante "o baleiro da indiferenza e do conformismo, ante a violencia da guerra e da mentira".

Durante unha vixilia na praza de Lima, convidou a xente nova a buscar a verdade que permanece fronte ás "mentiras" que se atopan nas redes, para darlle "unha nova dirección á sociedade".

"A misión que vos confío é precisamente esta: que sexades humanos. Si,sede humanos!: homes e mulleres de carne e óso. Non aparencias, senón rostros fiables".

Animounos a seren "persoas que buscan a xustiza porque teñen fame dela, como do pan de cada día".

"Persoas que desexan unha vida honesta e recta, porque gustosamente fan aos demais o que quererían que os demais fixesen con elas. Sede humanos como o é Cristo", engadiu.

Instounos tamén a facer de "misioneiros do Evanxeo ante as pobrezas materiais e espirituais do noso tempo, sabendo ben que a nosa fe é un estilo de vida que se cumpre na caridade".

"Vós podedes cambiar a Historia, facelo co amor", exclamou.

Baño de masas

O pontífice chegou en papamóbil á Praza de Lima tras un baño de masas entre as máis de 500.000 persoas que enchían a zona adxacente ao estadio Santiago Bernabeu.

Despois de saúdar e subir ao escenario, puido asistir a unha representación do musical Godspell, do actor Antonio Banderas, antes de comezar o diálogo cun grupo de 30 mozos e mozas.

"Grazas por compartir a fe con todo Madrid e toda España", exclamou.

Preguntáronlle polos santos que marcaron a súa vida e citou a Juan Crisóstomo, o español Tomás de Villanueva -un agostiño chamado a converterse en pastor- e Toribio de Mogrovejo.

Sobre os seus anos como misioneiro no Perú, lembrou "sobre todo o testemuño de fe da xente, marcada por moitas dificultades, pero chea de esperanza".

León XIV tamén incidiu na importancia do silencio.

"Ao liberarnos do estrondo de mil voces, recoñecemos que algunhas enganan os nosos desexos, outras nos compran sen alimentarnos, outras falan por interese (...) No silencio comprendemos que as ideoloxías pasan, mentres a verdade permanece (...) Buscade a verdade porque moitas cousas nas redes engánannos e cóntannos mentiras e Dios é verdade".

Do mesmo xeito, díxolles que están chamados "a dar unha nova dirección á sociedade, converténdovos en protagonistas do cambio a partir dos vosos vínculos cotiáns, aquilo que vivides na familia, na universidade e no traballo".

O acto concibido como un "festival de fe" arrincou ás 18:30 horas coa proxección do vídeo "Non é moda, é verdade", para dar paso a un grupo de xente nova que cantou un popurrí de cancións católicas.

A continuación, empezaron a desfilar polo escenario varios artistas: Lola Tuduri, Ignacio Serrano, Depol, Antonio José, Inazio, Hey Kid, Besmaya, Malmö, Beret, Mr.Rain e Siloé.

Visita ao CEDIA 24 horas

A vixilia da mocidade foi o último acto desta primeira xornada da viaxe oficial a España de León XIV, que comezou este sábado pola mañá cunha recepción oficial no Palacio Real.

Xa pola tarde, inaugurou a súa axenda en Madrid cunha visita ao Centro de Emerxencia e Atención Integral (CEDIA) 24 horas, de Cáritas, no barrio de Lucero, que atende persoas sen teito.

"Grazas, Madrid, por esta benvida, que me fai sentir parte dunha gran e marabillosa familia en que, como en todas as familias, ocorren milagres de amor. En particular nesta casa, onde ninguén queda só", aseverou ao empezar o seu discurso neste espazo.

Segundo dixo, "a alegría e a dor de cada un son a alegría e a dor de todos e, ao escoitarnos mutuamente, afrontamos xuntos os retos, sen ignorar a complexidade das situacións e, ao mesmo tempo, sen deixar de lado as esixencias da caridade e da xustiza".

O Papa, que asegurou sentirse "coma un madrileño máis", percorreu as instalacións, saudou o persoal e o voluntariado de Cáritas e escoitou testemuños de persoas acollidas.