O novo túnel de Oural facilitará a conexión de Lugo coa alta velocidade

O Ministerio de Transportes alcanza un novo avance nas obras do ferrocarril na provincia de Lugo coa entrada en servizo este martes do novo túnel de Oural, unha infraestrutura clave para a modernización e mellora do corredor Ourense-Monforte-Lugo.

O delegado do Goberno en Galicia, Pedro Blanco, asegurou este luns durante a inauguración que supón un paso decisivo na conexión de Lugo coa rede de alta velocidade a través de Ourense. Foron necesarios catro anos de obras e un investimento duns 50 millóns de euros.

Subliñou que esta actuación representa "o paso do abandono á modernidade" e demostra que "cando existe vontade política, as obras execútanse, os investimentos materialízanse e a provincia de Lugo gaña oportunidades". Segundo destacou, o proxecto simboliza "unha porta aberta ao futuro ferroviario da provincia, deixando atrás décadas de atraso e situando a Lugo no mapa da modernización ferroviaria de España".

O novo túnel, cunha lonxitude de 1,9 quilómetros, incorpórase á liña cunha vía única electrificada sobre placa de formigón que reforzará a fiabilidade, a seguridade e a capacidade de todo o corredor. Ademais, permitirá avanzar cara a un tren "máis moderno, cómodo e competitivo", facilitando a futura conexión coa alta velocidade.

Imaxe do interior do túnel

A obra forma parte dun plan de modernización integral da liña Ourense-Monforte-Lugo, que mobiliza un investimento cualificado por Blanco de "histórico", tras alcanzar os 626 millóns de euros financiados con fondos europeos do Plan de Recuperación, Transformación e Resiliencia.

Este programa inclúe a renovación de estacións como as de Monforte, Sarria, Rubián, Oural e Laxosa, o reforzo de 56 pontes e túneles, a electrificación de tramos, a actualización de sistemas de sinalización e a construción da nova estación de Lugo, entre outras actuacións. Ata o momento, xa se executaron máis de 507 millóns deste orzamento.

En paralelo, o túnel histórico de Oural, en servizo desde finais do século XIX, será reconvertido nunha galería de evacuación equipada con tres saídas de emerxencia cada 500 metros, accesibles para vehículos de mantemento e equipos de rescate, mentres que o novo túnel contará con pasos biviais que facilitarán o acceso de vehículos á vía en caso de necesidade.

O delegado do Goberno estará acompañado na inauguración pola subdelegada en Lugo, Olimpia López, e o presidente da Deputación, José Tomé, xunto a outras autoridades, entre elas o socialista José Ramón Gómez Besteiro. 

Precisamente, o Adif informou de que, coa colaboración de Renfe, realizou esta mesma xornada un simulacro de emerxencia neste túnel, previo á posta en funcionamento con circulacións ferroviarias da infraestrutura.