O Nobel de Medicina recoñece as investigacións da tolerancia inmunolóxica periférica
Mary E. Brunkow, Fred Ramsdell e Shimon Sakaguchi son os tres galardoados neste 2025 polo Instituto Karolinska de Estocolmo
(The Nobel Committee for Physiology or Medicine)
O Premio Nobel de Medicina ou Fisioloxía 2025 é para Mary E. Brunkow, Fred Ramsdell e Shimon Sakaguchi "polos seus descubrimentos relacionados coa tolerancia inmunolóxica periférica", informou este luns a Asemblea Nobel do Instituto Karolinska de Estocolmo.
Os galardoados deste ano identificaron os gardas de seguridade do sistema inmunitario, as células T reguladoras, que evitan que as células inmunitarias ataquen o noso propio organismo.
Os descubrimentos dos premiados sentaron as bases para un novo campo de investigación na tolerancia periférica, o que impulsou o desenvolvemento de tratamentos médicos para o cancro e as enfermidades autoinmunes, que tamén pode conducir a transplantes máis exitosos.
Varios destes tratamentos atópanse actualmente en fase de ensaios clínicos.
A esperanza é poder tratar ou curar enfermidades autoinmunes, proporcionar tratamentos máis eficaces contra o cancro e previr complicacións graves tras os transplantes de células nai.
Sakaguchi, descubriu en 1995 unha nova clase de células T, un achado clave, xa que neses momentos moitos investigadores estaban convencidos de que a tolerancia inmunolóxica só se desenvolvía debido á eliminación de células inmunitarias potencialmente daniñas no timo, a través dun proceso denominado tolerancia central.
O científico demostrou que o sistema inmunitario é máis complexo e descubriu unha clase de células inmunitarias ata entón descoñecida, que protexe ao organismo das enfermidades autoinmunes.
Brunkow e Ramsdel, obtiveron coñecementos decisivos sobre a orixe das enfermidades autoinmunes, despois de que en 2001 fixesen un descubrimento clave, cando explicaron por que unha cepa específica de ratos (denominada scurfy) é particularmente vulnerable ás enfermidades autoinmunes.
Ambos os científicos descubriron que os ratos presentaban unha mutación nun xene ao que chamaron Foxp3 e demostraron tamén que as mutacións no equivalente humano deste xene causan unha grave enfermidade autoinmune, a IPEX.
