O Ministerio de Vivenda pide á Xunta que peche 4.450 pisos turísticos ilegais detectados polo rexistro único

A ministra de Vivenda, Isabel Rodríguez, enviou unha carta á Xunta de Galicia na que pide que leve a cabo a "inspección, sanción e clausura" das máis de 4.450 vivendas turísticas que detectou no último ano o rexistro único estatal, que o Tribunal Supremo tombou este mes.

"É incoherente e incomprensible ter un discurso de que é necesario construír máis vivenda para aumentar a oferta e reducir os prezos, asunto que comparto, e á vez permitir que 4.400 vivendas se atopen en situación de fraude e ilegalidade a través dos alugueiros de curta duración", valora.

A misiva foi enviada directamente o mércores á conselleira de Vivenda, María Martínez Allegue, como fixo con outros responsables autonómicos.

Rodríguez manifesta que "acata" a sentenza do Supremo, que "confirma" a "competencia exclusiva" das comunidades autónomas nos rexistros de aloxamentos turísticos e de temporada e, por iso, pide ao Goberno galego que exerza a vixilancia que lle corresponde.

No seu texto, a ministra considera que o labor da Xunta nesta materia da súa competencia "é insuficiente, cando non inexistente" en base "ao demostrado pola vía dos feitos" cos datos recompilados polo rexistro estatal desde que entrou en funcionamento o 1 de xullo de 2025.

Por exemplo, "sorpréndelle" que, en cidades como Santiago, "cun réxime de licenzas bastante restritivo", apunta, existan "un número de solicitudes moi por enriba das licenzas municipais concedidas".

Pensa que isto demostra "con claridade" que unha declaración responsable como único requisito para inscribir un piso turístico é "manifestamente insuficiente", "especialmente cando vai acompañada dunha verdadeira revisión e exclusión dos rexistros autonómicos daquelas vivendas que non cumpran a lei".

"Imos estar moi vixiantes", advirte a ministra

Na clausura da súa carta, advirte á Xunta que o Goberno velará por que se leven a cabo as "accións oportunas" para evitar que se siga producindo esta fraude e garantir que non se vulnere o dereito á vivenda.

"Cando os dereitos da cidadanía están en xogo, non se pode eludir a nosa responsabilidade, hai que traballar para garantilos. Esta é a oportunidade. Confío en que tomen o camiño correcto", conclúe.