O maior alixo da historia: as 30,2 toneladas de cocaína do barco interceptado ao sur das Canarias

O barco interceptado pola Garda Civil a semana pasada no Atlántico, ao sur de Canarias, transportaba 1.279 fardos de cocaína cun peso de 30,2 toneladas, o maior alixo comisado ata a data nun só golpe policial, e cuxo valor ascende a máis de 812 millóns de euros.

Así consta no auto do xuíz da Audiencia Nacional Ismael Moreno en que o mércores enviou a prisión provisional aos 23 detidos nesta operación, en que os axentes comisaron, así mesmo, tres fusís con dous cargadores, unha pistola con tres cargadores e dez caixas de munición sen abrir.

O buque, un mercante con bandeira de Comores de nome Arconian, foi interceptado o 1 de maio por un barco da Garda Civil fronte ás costas do Sáhara Occidental, tras partir desde Serra Leona con rumbo declarado a Libia.

Os axentes acharon 1.279 fardos cun peso bruto total de 30.215,84 quilogramos de cocaína, cuxo valor estimado é de 812.210.779,2 euros, segundo detalla o maxistrado que está a cargo da investigación. Na abordaxe do buque, explica a resolución xudicial, foron localizados 17 tripulantes, tal e como manifestara o capitán, aínda que na zona de proa descubriuse a outras seis persoas que estaban ocultas e portaban diversas armas de fogo.

Durante a inspección da nave, na zona de popa observouse unha porta de metal coa que se accedía a outras zonas do barco. Alí descubriuse unha galería de gran lonxitude con vultos similares aos utilizados para transportar droga, segundo o auto.

Na causa, que naceu tras unha querela da Fiscalía Antidroga, investíganse delitos contra a saúde pública -coas agravantes de contía de notoria importancia e extrema gravidade pola utilización de buques, embarcacións ou aeronaves como medio de transporte-, pertenza a organización criminal, tenza ou depósito de substancias inflamables e de armas de guerra.

Para enviar a prisión provisional aos arrestados, o xuíz tivo en conta o risco de fuga derivado da gravidade das penas ás que poderían ser condenados, e a posible comisión doutros delitos. Sen esquecer que, ao non concretarse todos os presuntos responsables dos feitos, considera que a investigación estaría en risco se os detidos permanecen en liberdade.

O maxistrado explica no seu auto que o 2 de maio recibiu comunicación da Unidade Central operativa (UCO) da Garda Civil que informaba da interceptación, o día anterior, dunha embarcación que transportaba grandes cantidades de cocaína para o seu transvasamento a outras naves de alta velocidade e a súa posterior introdución na península.

Este operativo desenvolveuse no marco conxunto de recepción e análise de intelixencia contra o narcotráfico a través das canles de cooperación internacional, en concreto da DEA (Drug Enforcement Administración) estadounidense e da Unidade do Equipo de Intelixencia e Intervencións da Policía holandesa.