Comeza este martes a rolda da vintena de interrogatorios sinalados no caso Leire

O xuíz da Audiencia Nacional Santiago Pedraz comeza este martes coa vintena de interrogatorios que sinalou no caso Leire, a maior parte testemuñas, entre os que destaca a presidenta do PSOE Cristina Narbona, que está citada para o 10 de xullo.

O xeneral ao mando da Xefatura da Garda Civil e o comandante en funcións de secretario do DAO da Garda Civil Juan Manuel Barco Mostazo abrirán hoxe esta rolda de comparecencias.

Ambos están citados como testemuñas en relación á información reservada que o DAO da Garda Civil Manuel Llamas ordenou abrir á UCO por presuntas filtracións no caso Koldo, en concreto dunhas mensaxes de WhatsApp entre o presidente do Goberno e o exministro José Luis Ábalos, que acabou admitindo que foi el quen as filtrou.

Estes dous membros da Garda Civil súmanse aos catro que están citados o venres tamén como testemuñas, entre eles o exmáximo responsable da UCO Rafael Yuste, o xeneral xefe de Policía Xudicial deste corpo Alfonso Alberto López Malo, quen alertou dunha campaña contra a UCO, e o xeneral xefe do Estado Maior da Garda Civil.

Segundo a investigación, a exmilitante do PSOE Leire Díez tratou de promover unha investigación contra a UCO, para o que contactaría mesmo coa directora xeral da Garda Civil Mercedes González, coa que se chegou a reunir en tres ocasións, segundo ela mesma confirmou, aínda que asegurou que en ningún momento se tratou nada deste asunto.

Tras estas comparecencias, o xoves será a quenda de Jacobo Teijelo, un dos dous avogados imputados nesta causa, que representa no caso Koldo ao anterior número tres do PSOE Santos Cerdán. A outra avogada imputada é a de Koldo García, Leticia de la Hoz, citada o 14 de xullo.