O Jairis acaba coa xeira vitoriosa do Ensino
O equipo murciano gañou con claridade no Pazo por 58-81
O Hozono Global Jairis rachou a xeira vitoriosa do Durán Maquinaria Ensino -levaba cinco triunfos seguidos- na Primeira División feminina de baloncesto. O cadro murciano gañou con claridade (58-81) nun partido que dominou por completo e no que só pasou por algún apuro no terceiro cuarto.
Desde a defensa comezou a cimentar a vitoria o Jairis que dominou o primeiro cuarto por 9-16 e chegou ao descanso cunha clara vantaxe (22-45). O acerto no tiro exterior de Jasmine Walker (6 triplas) e Lou López Senechal marcaba a diferenza. O Ensino tirou de carraxe no terceiro cuarto no que buscou a fazaña e gañou o parcial por 29-18 (51-63). Precisaba un último cuarto ao mesmo nivel pero o Jairis volveu a controlar a situación para marchar coa vitoria dun xeito cómodo.
